မြောက်ကိုရီးယားနိုင်ငံ၊ ကေဆောင် (Kaesong) စက်မှုဇုန်တွင် ရင်းနှီးမြှုပ်နှံထားသည့် တောင်ကိုရီးယား လုပ်ငန်းရှင်များအသင်း (CAGIC) သည် ပိတ်သိမ်းထားသည်မှာ ၁၀ နှစ်ကြာပြီဖြစ်သော အဆိုပါစက်မှုဇုန်အတွင်းရှိ ၎င်းတို့၏ ပိုင်ဆိုင်မှုများကို သွားရောက်စစ်ဆေးခွင့်ရရန် အစိုးရက ကူညီဆောင်ရွက်ပေးဖို့ အင်္ဂါနေ့ (ဖေဖော်ဝါရီ ၁၀၊ ၂၀၂၆) တွင် တိုက်တွန်းလိုက်သည်။ ကိုရီးယားနှစ်နိုင်ငံ စီးပွားရေးပူးပေါင်းဆောင်ရွက်မှု၏ ပြယုဂ်ဖြစ်ခဲ့သော အဆိုပါစက်မှုဇုန်ကို မြောက်ကိုရီးယား၏ နူကလီးယားစမ်းသပ်မှုများကြောင့် ၂၀၁၆ ခုနှစ်၊ ဖေဖော်ဝါရီလ ၁၀ ရက်နေ့တွင် စတင်ပိတ်သိမ်းခဲ့ခြင်း ဖြစ်သည်။ ယခုအခါ ကုမ္ပဏီပေါင်း ၃၈ ခုမှ ကိုယ်စားလှယ် ၈၀ ခန့်သည် ပါဂျူး (Paju) မြို့ရှိ နယ်စပ်ဂိတ်တွင် သတင်းစာရှင်းလင်းပွဲပြုလုပ်ကာ ၎င်းတို့၏ လုပ်ငန်းများ ဆက်လက်ရှင်သန်နိုင်ရေးအတွက် စက်မှုဇုန်ကို ပြန်လည်ဖွင့်လှစ်ရန်နှင့် ပိုင်ဆိုင်မှုများ ပျက်စီးဆုံးရှုံးမှု ရှိ၊ မရှိ စစ်ဆေးခွင့်ပြုရန် တောင်းဆိုခဲ့ကြသည်။ တစ်ချိန်တည်းမှာပင် တောင်ကိုရီးယား ပြန်လည်ပေါင်းစည်းရေးဝန်ကြီးဌာနကလည်း အဆိုပါစက်မှုဇုန်အား အမြန်ဆုံးပြန်လည်ဖွင့်လှစ်နိုင်ရန်နှင့် နှစ်နိုင်ငံဆက်သွယ်ရေးလမ်းကြောင်းများ ပြန်လည်တည်ဆောက်ရန် မျှော်လင့်ကြောင်း ထုတ်ဖော်ပြောကြားခဲ့သည်။
