ရန်ကုန်တိုင်း၌ မီးပွိုင့်နှင့် လမ်းဆုံလမ်းခွများတွင် တောင်းရမ်းသူနှင့် ဈေးရောင်းသူ ၄,၃၀၀ ကျော်အား ဖမ်းဆီးအရေးယူခဲ့

ရန်ကုန်တိုင်းဒေသကြီးအတွင်းရှိ မီးပွိုင့်များနှင့် လမ်းဆုံလမ်းခွများတွင် တောင်းရမ်းစားသောက်သူများနှင့် ဈေးရောင်းချသူ ၄,၃၇၁ ဦးကို ၂၀၂၂ ခုနှစ် မတ်လမှ ၂၀၂၆ ခုနှစ် ဇူလိုင်လကုန်အထိ ၄ နှစ်ကျော်ကာလအတွင်း ဖမ်းဆီးအရေးယူခဲ့ကြောင်း ရန်ကုန်တိုင်းဒေသကြီးအစိုးရအဖွဲ့၊ စည်ပင်သာယာရေးဝန်ကြီး ဦးမျိုးမြင့်အောင်က ပြောကြားလိုက်သည်။ မီးပွိုင့်များနှင့် လမ်းဆုံလမ်းခွများ၌ တောင်းရမ်းသူများနှင့် ဈေးရောင်းချသူများ ပပျောက်စေရန် သက်ဆိုင်ရာ မြို့နယ်စီမံအုပ်ချုပ်ရေးအဖွဲ့ ဦးဆောင်သော ပူးပေါင်းအဖွဲ့ဖြင့် ၂၀၂၂ ခုနှစ် မတ် ၁၄ ရက်မှစ၍ နေ့စဉ် ရှင်းလင်းဆောင်ရွက်ခဲ့ခြင်းဖြစ်သည်။ယခု ၂၀၂၆ ခုနှစ် ဇန်နဝါရီ ၁ ရက်မှ ဇူလိုင် ၃၁ ရက်အထိ တောင်းရမ်းသူနှင့် ဈေးရောင်းသူ ၁,၁၀၀ ကျော် ဖမ်းဆီးခဲ့ပြီး ၁၇ ဦးကို အမှုဖွင့် တရားစွဲဆိုခဲ့သည်။ ထို့အပြင် ခံဝန်လက်မှတ် ရေးထိုးသူ ၆၁၉ ဦး၊ သက်ဆိုင်ရာ လူငယ်သင်တန်းကျောင်းများသို့ ပို့အပ်သူ ၄၆ ဦးနှင့် မိဘအုပ်ထိန်းသူများထံ ခံဝန်ဖြင့် ပြန်လည်အပ်နှံသူ ၄၄၅ ဦး ရှိခဲ့ကြောင်း သိရသည်။