ဧရာဝတီတိုင်းဒေသကြီးအတွင်းရှိ မြို့ ၅ မြို့၌ မြစ်ရေများ စိုးရိမ်ရေမှတ်အထက် ဆက်လက် မြင့်တက်မည်ဟုဆို

ဧရာဝတီမြစ်၊ ငဝန်မြစ်နှင့် တိုးမြစ်ရေများ ဆက်လက် မြင့်တက်လာမှုကြောင့် ဧရာဝတီတိုင်းဒေသကြီးအတွင်းရှိ ဆိပ်သာ၊ ဟင်္သာတ၊ ဇလွန်၊ ငါးသိုင်းချောင်းနှင့် မအူပင်မြို့တို့တွင် မြစ်ရေသည် စိုးရိမ်ရေမှတ်အထက်သို့ ရောက်ရှိနေပြီး နောက်တစ်ရက်အတွင်း ထပ်မံ မြင့်တက်လာမည်ဖြစ်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ဩဂုတ် ၁၇ ရက်တွင် ထုတ်ပြန်လိုက်သည်။ ဧရာဝတီမြစ်ရေသည် ဟင်္သာတနှင့် ဇလွန်မြို့တို့တွင် စိုးရိမ်ရေမှတ်အထက် ရောက်ရှိနေပြီး လာမည့် ၂၄ နာရီအတွင်း ၈ လက်မခန့် ထပ်မံ မြင့်တက်လာမည် ဖြစ်ရာ တာတမံများနှင့် မြေထိန်းနံရံများတွင် သဲအိတ်များ ကာရံ၍ အရေးပေါ် ဆောင်ရွက်နေရသည်။ မိုးသည်းထန်စွာ ရွာသွန်းမှုနှင့် မြစ်ရေ မြင့်တက်မှုများကြောင့် ဧရာဝတီတိုင်းဒေသကြီးအပါအဝင် ရခိုင်ပြည်နယ်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီးနှင့် ပဲခူးတိုင်းဒေသကြီးတို့ရှိ မြို့နယ် ၄၁ ခုတွင် ရေဘေးသင့် ပြည်သူ ၁ ဒသမ ၃ သန်းအထိ ရှိလာခဲ့ကြောင်း သိရသည်။