နေပြည်တော်ရှိ ပေါင်းလောင်းရေလှောင်တမံ ကန်ရေပြည့်အမှတ်သို့ ရောက်ရှိလာသော်လည်း ရေပိုလွှဲမှ ရေကျော်ခြင်း မရှိသေး

ပြည်ထောင်စုနယ်မြေ နေပြည်တော်အတွင်းရှိ ပေါင်းလောင်းရေလှောင်တမံ၏ ရေမှတ်မှာ ဩဂုတ် ၁၇ ရက် ညနေ ၄ နာရီ ၁၅ မိနစ်တွင် ကန်ရေပြည့်အမှတ်ဖြစ်သော ၁၉၀ မီတာ (၆၂၃.၃၉ ပေ) သို့ ရောက်ရှိလာခဲ့ကြောင်း ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန (တည်ဆောက်ရေး-၅) ၏ ထုတ်ပြန်ချက်အရ သိရသည်။ရေလှောင်တမံမှာ ကန်ရေပြည့်အမှတ်သို့ ရောက်ရှိလာသော်လည်း ရေပိုမိုသိုလှောင်၍ လျှပ်စစ်ဓာတ်အား ထုတ်လုပ်နိုင်ရန်နှင့် တမံအောက်ပိုင်း ရေကြီးရေလျှံမှု လျော့ပါးသက်သာစေရန်အတွက် ရေပိုလွှဲတွင် HED ရေတံခါးရွက် ၂၀ ချပ်အား ထောင်ထားသဖြင့် ရေပိုလွှဲမှ ရေကျော်ခြင်း မရှိသေးပေ။ရှေ့ဆက်၍ ဝင်ရေအခြေအနေပေါ် မူတည်ပြီး ရေပိုလွှဲမှ ရေကျော်လွန်ပါက သတင်းအချက်အလက်များကို အချိန်နှင့်တစ်ပြေးညီ တင်ပြထုတ်ပြန်ပေးသွားမည်ဖြစ်ကြောင်း သက်ဆိုင်ရာ ဌာနက အသိပေးထားသည်။