မွန်ပြည်နယ်၊ မော်လမြိုင်မြို့၊ မုပွန်ရပ်ကွက်၊ တိုးချဲ့ (၈) လမ်းရှိ နှစ်ထပ်တိုက် နေအိမ်တွင် ဩဂုတ် ၁၆ ရက် နံနက် ၁၀ နာရီ ၁၅ မိနစ်ခန့်က ဂတ်စ်မီးဖိုမှတစ်ဆင့် မီးလောင်မှု ဖြစ်ပွားခဲ့ကြောင်း မြို့နယ် မီးသတ်ဦးစီးဌာနထံမှ သိရသည်။
ဖြစ်စဉ်မှာ အဆိုပါ နေအိမ်တွင် အိမ်ငှားနေထိုင်သူ ဦးလင်းပိုင် (၄၄ နှစ်) သည် နှစ်ထပ်တိုက် နေအိမ်အပေါ်ထပ်၌ ဂတ်စ်မီးဖို မီးမွှေးရာမှ အနီးရှိ ဓာတ်ဆီဗူးများသို့ မီးကူးစက်ခဲ့ခြင်း ဖြစ်သည်။ မီးလောင်မှု ဖြစ်ပွားရာသို့ မော်လမြိုင်မြို့နယ် မီးသတ်ဦးစီးမှူး ဦးစီးသော မီးသတ်တပ်ဖွဲ့ဝင်များ၊ လူမှုကူညီကယ်ဆယ်ရေး အဖွဲ့များနှင့် ရပ်ကွက်သူ/သားများ ပူးပေါင်း၍ မီးသတ်ယာဉ် ၃ စီး၊ ရေသယ်ယာဉ် ၂ စီးဖြင့် ငြိမ်းသတ်ခဲ့ရာ နံနက် ၁၀ နာရီခွဲတွင် မီးလုံးဝ ငြိမ်းသွားခဲ့သည်။အဆိုပါ မီးလောင်မှုကြောင့် နှစ်ထပ်တိုက် နေအိမ်၏ အပေါ်ထပ် မီးဖိုခန်း အစိတ်ပိုင်းခန့်သာ မီးလောင်ကျွမ်းခဲ့ပြီး မီးပေါ့ဆစွာ သုံးစွဲသူ ဦးလင်းပိုင်အား မုပွန်နယ်မြေရဲစခန်းမှ အမှုဖွင့် အရေးယူရန် စီစဉ်ဆောင်ရွက်လျက် ရှိသည်။
