ရှမ်းပြည်နယ် (အရှေ့ပိုင်း)၊ တာချီလိတ်မြို့၌ ဩဂုတ် ၁၅ ရက် ညနေပိုင်းက မိုးရွာသွန်းခဲ့မှုကြောင့် နမ့်ယွန်းချောင်း ရေလျှံကာ မြို့တွင်း လမ်းများပေါ်တွင် ရေကြီးရေလျှံမှုများ ဖြစ်ပေါ်ခဲ့ကြောင်း ဒေသခံများထံမှ သိရသည်။မိုးရွာသွန်းမှုကြောင့် နမ့်ယွန်းချောင်း ရေလျှံခဲ့သဖြင့် မကာဟိုခမ်း ရပ်ကွက်အတွင်းရှိ ဘုရင့်နောင်ဈေးရှေ့ ရတနာလမ်းမကြီး၊ ရှမ်းရိုးမရှေ့၊ မီးသတ်လမ်း၊ ဝမ်ကောင်း ကာစ္စတန်ရှေ့နှင့် တာလော့ကျောင်းရှေ့တို့တွင် ရေကြီးရေလျှံမှုများ ဖြစ်ပွားခဲ့ခြင်းဖြစ်သည်။ ပြီးခဲ့သည့် ဩဂုတ်လ ၄ ရက်က စည်ပင်နှင့် အုပ်ချုပ်ရေးပိုင်းတို့ ပူးပေါင်း၍ နမ့်ယွန်းချောင်းအတွင်းရှိ နှုန်းများ တူးဖော်ရှင်းလင်းခဲ့သော်လည်း မိုးရွာသည်နှင့် ရေကြီးရေလျှံမှု ထပ်မံဖြစ်ပေါ်ခဲ့ရသည်။မိုးလေဝသ ခန့်မှန်းချက်များအရ ဩဂုတ် ၁၉ ရက်မှ ၂၇ ရက်အတွင်း ရှမ်းပြည်နယ် အရှေ့ပိုင်း၊ တာချီလိတ်၊ မိုင်းဆတ်နှင့် မိုင်းတုံ မြို့နယ်တို့တွင် မိုးပိုမို ရွာသွန်းနိုင်သဖြင့် မယ်ဆိုင်ချောင်းရေကို သတိပြုရန် လိုအပ်မည်ဖြစ်သည်။ လက်ရှိတွင် မယ်ဆိုင်ချောင်းရေမှာ စိုးရိမ်ရေမှတ်ဖြစ်သည့် ၃၉၀ စင်တီမီတာ အနီး၌သာ ရှိနေသေးကြောင်း သိရသည်။
