ပြည်တွင်းစားသုံးမှုဖူလုံရေး ဦးစားပေးပြီး ပိုလျှံထုတ်ကုန်များ ပြည်ပသို့ ပို့ကုန်နှစ်ဆတိုးမြှင့်တင်ပို့ရန် စီးပွား/ကူးသန်းဝန်ကြီး တိုက်တွန်း

ပြည်တွင်း စားသုံးမှု ဖူလုံစေရေးအတွက် ကုန်ပစ္စည်းများကို သက်သာသော ဈေးနှုန်းဖြင့် ဦးစွာ ဖြန့်ဖြူးပေးပြီး ပိုလျှံသည့် ထုတ်ကုန်များကို ပြည်ပသို့ ပို့ကုန်နှစ်ဆ တိုးမြှင့် တင်ပို့နိုင်ရေး ကြိုးပမ်းဆောင်ရွက်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးထွန်းအုံက တိုက်တွန်းပြောကြားခဲ့သည်။ ပြည်ထောင်စုဝန်ကြီးသည် ဩဂုတ်လ ၁၄ ရက်နေ့က ရန်ကုန်မြို့ရှိ စက်မှုဇုန်များအတွင်း စက်ရုံ၊ အလုပ်ရုံများ၏ ထုတ်လုပ်မှုနှင့် ပို့ကုန် တိုးမြှင့်တင်ပို့နိုင်ရေး အခြေအနေများကို ကွင်းဆင်းကြည့်ရှုစစ်ဆေးစဉ် ယင်းသို့ တိုက်တွန်းခဲ့ခြင်းဖြစ်ကြောင်း သိရသည်။