ဧရာဝတီတိုင်းဒေသကြီး၊လေးမျက်နှာမြို့နယ်၌ ရေဘေးကယ်ဆယ်ရေးယာဉ်များ သွားလာမှု အဆင်ပြေစေရန် လမ်းများ ပြင်ဆင်ပေး

ဧရာဝတီတိုင်းဒေသကြီး၊ လေးမျက်နှာမြို့နယ်အတွင်း ဖြစ်ပွားလျက်ရှိသည့် ရေကြီးရေလျှံမှုကြောင့် ရေဘေးကယ်ဆယ်ရေးယာဉ်များ အဆင်ပြေချောမွေ့စွာ သွားလာနိုင်ရေးအတွက် ဆောက်လုပ်ရေးဝန်ကြီးဌာန၊ လမ်းဦးစီးဌာနမှ လမ်းများ ပြင်ဆင်ပေးလျက်ရှိကြောင်း သိရသည်။အထူးသဖြင့် ရေဘေးကယ်ဆယ်ရေးယာဉ်များ အဓိက သွားလာရာလမ်းကြောင်းများဖြစ်သည့် တလုတ္တော်-လေးမျက်နှာလမ်း၊ ဟင်္သာတ-ဆုံကုန်း-မြန်အောင်လမ်းနှင့် ပဆင-ခြောက်ရွာ-ကျွဲသောင်လမ်းတို့ကို ဟင်္သာတခရိုင် လမ်းဦးစီးဌာနနှင့် ကြီးကြပ်ရေးအဖွဲ့မှ အင်ဂျင်နီယာများနှင့် အလုပ်သမားများက ပြင်ဆင်ပေးနေခြင်းဖြစ်သည်။ ရေကြီးရေလျှံမှုကြောင့် ကားလမ်းများပေါ်တွင် ချိုင့်ခွက်ကြီးများ ဖြစ်ပေါ်ခဲ့ရာ ရေပြန်လည်ကျဆင်းသည့် အချိန်၌ ကျောက်ဖြည့် သဲညှပ်၍ ယာယီလမ်းပေါက် ဖာထေးခြင်း လုပ်ငန်းများကို ပြုလုပ်ပေးလျက်ရှိကြောင်း သိရသည်။