ရှမ်းပြည်နယ်၊ အင်းလေးဒေသ၌ ခရမ်းချဉ်သီးဈေး အနိမ့်ဆုံးသို့ ကျဆင်းမှုကြောင့် တောင်သူများနှင့် ပွဲရုံများ အရှုံးပေါ်နေ

ရှမ်းပြည်နယ် (တောင်ပိုင်း) အင်းလေးကန်ဒေသတွင် ခရမ်းချဉ်သီးဈေးနှုန်းများ အနိမ့်ဆုံးအဆင့်အထိ ကျဆင်းနေသဖြင့် စိုက်ပျိုးရေးတောင်သူ ၃ ပုံ ၂ ပုံခန့်နှင့် ရောင်းဝယ်ရေးပွဲရုံများ အရှုံးဖြင့် ရင်ဆိုင်နေရကြောင်း သိရသည်။၂၀၂၆ ခုနှစ် ဩဂုတ်လအတွင်း ခရမ်းချဉ်သီး (အစိမ်း/အမှည့်) တစ်ပိဿာလျှင် ၇၀၀ ကျပ်မှ ၈၀၀ ကျပ်အထိသာ ရောင်းဝယ်နေရပြီး အသေးအမျိုးအစားမှာ ၁,၀၀၀ ကျပ်၊ ရှယ်အမျိုးအစားမှာ ၁,၃၀၀ ကျပ်ခန့်သာ ရရှိသည်။ ဇူလိုင်လအတွင်းက တစ်ပိဿာ ၂,၀၀၀ ကျပ်ခန့်အထိ ရရှိခဲ့သော်လည်း ဇူလိုင်လလယ်မှစ၍ ၁,၀၀၀ ကျပ်အောက်သို့ ပြန်လည်ကျဆင်းခဲ့ခြင်းဖြစ်သည်။ဈေးနှုန်းကျဆင်းရခြင်းမှာ ကုန်းပေါ်ဒေသများမှ ခရမ်းချဉ်သီးများ တစ်ပြိုင်တည်း ထွက်ရှိလာခြင်း၊ ရေကြီးမှုနှင့် လမ်းပန်းဆက်သွယ်ရေး ခက်ခဲ၍ သယ်ယူပို့ဆောင်ရန် အဆင်မပြေခြင်း၊ ဝယ်လိုအား နည်းပါးခြင်းတို့ကြောင့် ဖြစ်သည်။ ထို့ပြင် မြေဩဇာနှင့် ပိုးသတ်ဆေး အပါအဝင် သွင်းအားစုစရိတ်များ မြင့်တက်နေချိန်တွင် သီးနှံဈေးနှုန်းပါ ထက်ဝက်ကျော် ကျဆင်းသွားသဖြင့် ထုတ်လုပ်မှုစရိတ်ပင် ပြန်မရဘဲ တောင်သူများ အခက်တွေ့နေကြရသည်။