ရှမ်းပြည်နယ်၊ ပင်းတယနှင့် ရွာငံမြို့နယ်တို့၌ စိုက်ပျိုးရေးသုံးဆေးများ ကြောင့် တောင်ယာစိုက်ခင်းထွက်မှိုများ စားသုံးရန် ပြည်သူအချို့ စိုးရိမ်

ရှမ်းပြည်နယ်တောင်ပိုင်း၊ ပင်းတယနှင့် ရွာငံမြို့နယ်တို့တွင် မိုးရာသီ မှိုများ ပေါများချိန်၌ တောင်ယာစိုက်ခင်းများတွင် ပိုးသတ်ဆေးနှင့် ပေါင်းသတ်ဆေးများ အသုံးပြုထားသဖြင့် အဆိုပါ စိုက်ခင်းများမှ ထွက်ရှိသည့် မှိုများကို ဝယ်ယူစားသုံးရန် ဒေသခံအချို့ စိုးရိမ်လျက်ရှိကြပြီး တောထဲမှ သဘာဝအတိုင်း ပေါက်ရောက်သည့် မှိုများကိုသာ ရွေးချယ်စားသုံးနေကြကြောင်း သိရသည်။ ထို့ပြင် ဩဂုတ် ၇ ရက်ကလည်း ပင်းတယမြို့နယ်၊ လင်းလေအင်းကျေးရွာရှိ လက်ဖက်ခင်းအတွင်းမှ ကောက်ယူရရှိသည့် "မြေမှို" ကို ချက်ပြုတ်စားသုံးမိရာမှ မိသားစုဝင် ၇ ဦး အစာအဆိပ်သင့်၍ ဆေးရုံသို့ ပို့ဆောင်ခဲ့ရသည်။ ဒေသခံများ၏ အတွေ့အကြုံအရ စားသုံးနိုင်သည့်မှိုနှင့် အဆိပ်ရှိသည့်မှိုများမှာ ဆင်တူသဖြင့် ခွဲခြားရန် ခက်ခဲပြီး မှို၏ အရောင်အသွေးနှင့် အပြာရောင် ပြောင်းလဲမှု ရှိ/မရှိ စသည့် ဒေသတွင်း အတွေ့အကြုံများဖြင့် ခွဲခြားစားသုံးနေကြကြောင်း သိရသည်။