စစ်ကိုင်းတိုင်း၊ ကန့်ဘလူမြို့နယ်၌ ပဲတီစိမ်းစျေးနှုန်းများ ယခင်လထက် မြင့်တက်လာ

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ထန်းကုန်း၊ မိုးကောင်း စသည့် ကျေးရွာများမှ ထွက်ရှိသော ပဲတီစိမ်း စျေးနှုန်းများမှာ ယခင် ဇူလိုင်လ ပထမပတ်နှင့် နှိုင်းယှဉ်ပါက ယခု ဩဂုတ်လ ပထမပတ်တွင် မြင့်တက်လာကြောင်း သိရသည်။ ယခု ဩဂုတ်လ ပထမပတ်တွင် ပဲတီစိမ်း တစ်တင်းလျှင် ကျပ် ၈၂,၀၀၀ နှင့် ပဲတီစိမ်း (ထွက်တိုး) တစ်တင်းလျှင် ကျပ် ၈၆,၅၀၀ စျေးနှုန်းတို့ဖြင့် အရောင်းအဝယ် ဖြစ်လျက်ရှိရာ ယခင်လထက် ပဲတီစိမ်း တစ်တင်းလျှင် ကျပ် ၁၃,၅၀၀ နှင့် ပဲတီစိမ်း (ထွက်တိုး) တစ်တင်းလျှင် ကျပ် ၁၄,၀၀၀ ဝန်းကျင်ခန့် စျေးနှုန်းအသီးသီး မြင့်တက်လာခြင်း ဖြစ်သည်။ အဆိုပါ ပဲတီစိမ်းများကို မန္တလေးမြို့ရှိ ကုန်စည်ဒိုင်များနှင့် ပွဲရုံများသို့ တင်ပို့ရောင်းချလျက်ရှိပြီး မန္တလေးစျေးကွက်မှ အဝယ်လိုက်မှုကြောင့် ဒေသထွက်ပဲများ စျေးနှုန်းမြင့်တက်လာခြင်းဖြစ်ကြောင်း သိရသည်။