ရှမ်းပြည်နယ်တစ်ဝန်း မိုးကြီးရေလျှံမှုများကြောင့် လမ်းတံတားများပျက်စီးပြီး မြေပြိုမှုများနှင့် လူပျောက်ဆုံးမှုများဖြစ်ပွား

ဩဂုတ်လ ၈ ရက်မှ ၉ ရက်အထိ ၂၄ နာရီအတွင်း ရှမ်းပြည်နယ်တစ်ခုလုံးတွင် မိုးသည်းထန်စွာရွာသွန်းမှုကြောင့် ရေကြီးရေလျှံခြင်း၊ တံတားပျက်စီးခြင်းနှင့် မြေပြိုခြင်းများ ဆက်တိုက်ဖြစ်ပွားနေကြောင်း သိရသည်။ ရှမ်းမြောက်ဒေသ လားရှိုး၊ သီပေါနှင့် ကျောက်မဲတို့တွင် ချောင်းရေမြစ်ရေများမြင့်တက်ကာ လမ်းပန်းဆက်သွယ်ရေးခက်ခဲခြင်းနှင့် နေအိမ်မြေပြိုပျက်စီးခြင်းများ ရှိခဲ့ပြီး၊ မိုးမိတ်ရှိ နန်းပန်းကူးတံတားနှင့် ဂုတ်တွင်းတံတားအလည်တိုင်တို့ ရေစီးတွင်မျောပါပျက်စီးခဲ့သဖြင့် ကားကြီးများ ဖြတ်သန်း၍မရတော့ဘဲ ဖြစ်နေသည်။ ထို့ပြင် ရှမ်းတောင် ကွန်ဟိန်းမြို့နှင့် ရှမ်းအရှေ့ တာချီလိတ်၊ ကျိုင်းတုံ၊ မိုင်းယန်း၊ မိုင်းဆတ်၊ မိုင်းယွန်းနှင့် မိုင်းတုံမြို့တို့တွင်လည်း ရေကြီးရေလျှံမှုများနှင့် လမ်းတံတားပျက်စီးမှုများ ဖြစ်ပေါ်နေကာ ကျိုင်းတုံနှင့် မိုင်းတုံတို့တွင် ရေစီးအတွင်း မျောပါပျောက်ဆုံးနေသူ ၂ ဦးရှိနေပြီး၊ ရှမ်းပြည်နယ်အတွင်း မိုးဆက်လက်ကြီးနိုင်သဖြင့် ရေကြီးမြေပြိုဘေးကို အထူးသတိပြုကြရန် ဖော်ပြထားသည်။