ဧရာဝတီတိုင်းဒေသကြီး၊ငဝန်ရေကာတာ တာဘောင်ကျိုးပေါက်မှုကြောင့် ရေကျော်ဝင်ရောက်နေမှုကို တားဆီးနိုင်ရန် ၂၄ နာရီပတ်လုံး ကြိုးပမ်းဆောင်ရွက်နေ

ဧရာဝတီတိုင်းဒေသကြီး၊ လေးမျက်နှာမြို့နယ်ရှိ ငဝန်ရေကာတာ တာဘောင်ကျိုးပေါက်မှုကြောင့် ရေကြီးရေလျှံမှုများ ဖြစ်ပွားလျက်ရှိရာ ရေထပ်မံကျော်ဝင်လာမှုကို တားဆီးနိုင်ရေးအတွက် တာဝန်ရှိသူများက ၂၄ နာရီပတ်လုံး နေ့ဆိုင်း/ညဆိုင်း ခွဲ၍ ကြိုးပမ်းဆောင်ရွက်လျက်ရှိကြောင်း သိရသည်။ အဆိုပါ ရေကာတာပြုပြင်ရေးလုပ်ငန်းများကို ဧရာဝတီတိုင်းအစိုးရအဖွဲ့၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ရေအရင်းအမြစ်နှင့် မြစ်ချောင်းများဖွံ့ဖြိုးတိုးတက်ရေးဦးစီးဌာန၊ ဆောက်လုပ်ရေးဝန်ကြီးဌာန၊ တံတားဦးစီးဌာနတို့မှ တာဝန်ရှိသူများအပြင် တပ်မတော်သားများနှင့် မီးသတ်တပ်ဖွဲ့ဝင်များပါ ပူးပေါင်းကာ လူအင်အား၊ စက်ယန္တရားအင်အားအပြည့်ဖြင့် အပြင်းအထန် ဆောင်ရွက်နေကြကြောင်း သိရသည်။