မြန်မာတစ်နိုင်ငံလုံးအတိုင်းအတာဖြင့် မိုးတိမ်တောင်များ ဖြစ်ပေါ်နေ၍ လေပြင်းတိုက်ခတ်ခြင်းနှင့် မိုးကြီးခြင်းများ သတိပြုရန် မိုးဇလ သတိပေး

ပြည်တွင်း၌ တိုင်းဒေသကြီးနှင့် ပြည်နယ်အားလုံးတွင် မိုးတိမ်တောင်များ ဖြစ်ထွန်းနေပြီး အဆိုပါ မိုးတိမ်တောင်များ ရွေ့လျားရာ လမ်းကြောင်းတစ်လျှောက် မိုးရွာသွန်းခြင်း၊ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်းနှင့် မိုးသီးကြွေခြင်းစသည့် ထူးခြားမိုးလေဝသ ဖြစ်စဉ်များ ဖြစ်ပေါ်နိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ဩဂုတ် ၈ ရက် ညနေပိုင်းတွင် ထုတ်ပြန်ခဲ့သည်။ ထို့ပြင် ရန်ကုန်၊ မန္တလေး၊ ပဲခူး၊ ဧရာဝတီ၊ တနင်္သာရီ၊ စစ်ကိုင်းတိုင်းဒေသကြီး အောက်ပိုင်းနှင့် ကရင်၊ မွန်၊ ရခိုင်၊ ရှမ်းပြည်နယ် (မြောက်ပိုင်း) တို့တွင် နေရာကွက်၍ မိုးကြီးနိုင်သဖြင့် ကြိုတင်သတိပြုရန် အသိပေးထားသည်။