ဧရာဝတီတိုင်းဒေသကြီး၊ လေးမျက်နှာမြို့နယ်ရှိ ရေဘေးသင့်ပြည်သူများအတွက် ဩဂုတ်လ ၇ ရက်နေ့အထိ လူဦးရေ ၄၀,၀၀၀ ကျော်အတွက် စုစုပေါင်း ကျပ် ၁၄၆ ဒသမ ၆၇၆ သန်းကျော်တန်ဖိုးရှိ အခြေခံစားသောက်ကုန်နှင့် ဆန်ရိက္ခာများ ထောက်ပံ့ပေးခဲ့ကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုး၏ ပြောကြားချက်အရ သိရသည်။ လက်ရှိတွင် လေးမျက်နှာမြို့ပေါ်ရပ်ကွက်များ၌ ရေပြန်လည်ကျဆင်းနေပြီး ရေဘေးကြောင့် ယာယီဖြုတ်သိမ်းခြင်းနှင့် ထိခိုက်မှုများရှိခဲ့သည့် မိုဘိုင်းစခန်းများအပါအဝင် ဆက်သွယ်ရေးကွန်ရက်များကို အရှိန်မြှင့် ပြန်လည်ထူထောင်လျက်ရှိရာ ဆက်သွယ်ရေးဝန်ဆောင်မှု ၃၅ ရာခိုင်နှုန်းခန့် ပြန်လည်ရရှိနေပြီဖြစ်ကြောင်း သိရသည်။
