ဧရာဝတီတိုင်း၊ မြောင်းမြမြို့ရှိ အဓိကစက်သုံးဆီဆိုင်ကြီးများ၌ ဩဂုတ်လ ၆ ရက်မှစတင်ကာ Octane 92 နှင့် 95 ဆီများ ပြတ်လပ်နေသဖြင့် တရားဝင်လိုင်စင်နှင့် QR စနစ်ဖြင့် ဝယ်ယူသည့် ဆိုင်ကယ်စီးပြည်သူများပါ ဆီဝယ်မရဘဲ အခက်အခဲကြုံတွေ့နေရကြောင်း မြို့ခံများထံမှ သိရသည်။ မြို့အတွင်းသို့ ဆီဘောက်ဆာကားများ အဆက်မပြတ် ဝင်ရောက်နေသော်လည်း ဆိုင်ကြီးများ၌ ဆီမရဘဲ အပြင်ဆိုင်ငယ်များတွင်မူ တစ်လီတာလျှင် ကျပ် ၁၅,၀၀၀ အထိ ဈေးနှုန်းမြှင့်တင်ကာ မှောင်ခိုရောင်းချနေမှုများ ရှိနေသဖြင့် ဆီဆိုင်ကြီးများက မှောင်ခိုပြန်ထုတ်ရောင်းနေခြင်းဖြစ်နိုင်ကြောင်း ဒေသခံများက ဝေဖန်နေကြသည်။ ထို့ကြောင့် စားဝတ်နေရေး ခက်ခဲသည့်ကြားမှ QR စနစ်ဖြင့် တရားဝင်ဝယ်ယူရန် ကြိုးစားသော်လည်း ဆီမရသဖြင့် အခြေခံလုပ်ငန်းခွင်ဝင်ပြည်သူများနှင့် ဆိုင်ကယ်ဖြင့် ဝမ်းစာရှာဖွေသူများ အဆင်မပြေဖြစ်နေရ၍ ဆီရရှိရန် မည်သို့စီစဉ်ပေးမည်နှင့် မှောင်ခိုဈေးကွက်ကို မည်သို့အရေးယူမည်ကို ဧရာဝတီတိုင်းဝန်ကြီးချုပ် ဦးအေးကျော်နှင့် တာဝန်ရှိသူများအနေဖြင့် အရေးတကြီး ကွင်းဆင်းစစ်ဆေးရှင်းလင်းပေးရန် ဒေသခံများက လိုလားနေကြကြောင်း သိရသည်။
