အစိုးရဘဏ္ဍာငွေသုံး စာအုပ်ပုံနှိပ်ခြင်းများကို အစိုးရပိုင်ပုံနှိပ်စက်ရုံများ၌သာ ဆောင်ရွက်ရန် ညှိနှိုင်း

နိုင်ငံတော်ဘဏ္ဍာငွေဖြင့် စာအုပ်စာစောင်များ ပုံနှိပ်ရာတွင် အစိုးရပိုင်ပုံနှိပ်စက်များ၌သာ စနစ်တကျ အပ်နှံလုပ်ဆောင်ရေး လုပ်ငန်းညှိနှိုင်းအစည်းအဝေးကို ဩဂုတ်လ ၇ ရက်နေ့က ပြန်ကြားရေးဝန်ကြီးဌာန၌ ကျင်းပခဲ့ကြောင်း သိရသည်။ အစည်းအဝေးတွင် အစိုးရဆိုင်ရာ ပုံနှိပ်လုပ်ငန်းများ စီမံခန့်ခွဲမှုကော်မတီဥက္ကဋ္ဌ ပြန်ကြားရေးဝန်ကြီး ဦးထိန်လင်းက ဇူလိုင် ၃ ရက် အစည်းအဝေးဆုံးဖြတ်ချက်များအတိုင်း စတင်အကောင်အထည်ဖော်နေမှုများကို ပြောကြားခဲ့ပြီး၊ ပြန်ကြားရေးဝန်ကြီးဌာန ပုံနှိပ်ရေးနှင့် ထုတ်ဝေရေးဦးစီးဌာန၊ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးညွှန်ကြားရေးမှူးရုံးနှင့် သာသနာရေးဝန်ကြီးဌာနပိုင် ပုံနှိပ်စက်ရုံများတွင် အချိန်မီအပ်နှံဆောင်ရွက်နိုင်ရေး ရှင်းလင်းဆွေးနွေးခဲ့ကြကြောင်း  သိရသည်။