မန္တလေး အိုးပုတ်ပွဲတော်ကို အများပြည်သူ တောင်းဆိုမှုကြောင့် ၂ ရက်ကြာ တရားဝင် ကျင်းပမည်ဟုဆို

မန္တလေးတိုင်းဒေသကြီး၊ အောင်မြေသာစံမြို့နယ်၊ အိုးဘိုရပ်ကွက်၌ အစဉ်အလာမပျက် ကျင်းပလေ့ရှိသည့် မန္တလေး အိုးပုတ်ပွဲတော်ကို ယခုနှစ်မှစ၍ ဝါခေါင်လဆန်း ၇ ရက်နှင့် ၈ ရက်တို့တွင် ၂ ရက်ဆက်တိုက် တရားဝင် ကျင်းပသွားမည်ဖြစ်သည်။ ယခင်နှစ်များက ဝါခေါင်လဆန်း ၈ ရက်နေ့ တစ်ရက်တည်းသာ ကျင်းပခဲ့သော်လည်း ယခုနောက်ပိုင်း ပွဲတော်၏ လူသိများမှုနှင့် စိတ်ဝင်စားမှု မြင့်တက်လာခြင်း၊ အများပြည်သူ၏ တောင်းဆိုမှုများ ရှိလာခြင်းတို့ကြောင့် တိုးချဲ့ကျင်းပရခြင်း ဖြစ်သည်။ တောင်ပြုံးပွဲတော် အကြိုအဖြစ် ရှေးနှစ်ပေါင်းများစွာကတည်းက ကျင်းပလာခဲ့သည့် အဆိုပါ ရိုးရာပွဲတော်ကို ၂ ရက်ကြာ ကျင်းပနိုင်ရေး ပွဲတော်ကျင်းပရေး ကော်မတီက စီစဉ်ထားကြောင်း သိရသည်။