ရှမ်းပြည်နယ် (မြောက်ပိုင်း)၊ လားရှိုးမြို့တွင် ၃ ရက်ဆက်တိုက် မိုးအဆက်မပြတ် ရွာသွန်းမှုကြောင့် အေတီတံတားနှင့် ခေးခမ်းရွာဘက်ရှိ တောင်သူများ၏ လယ်စပါးဧကပေါင်းများစွာ ရေနစ်မြှုပ်ခဲ့ကြောင်း ဒေသခံများထံမှ သိရသည်။ ထို့ပြင် လားရှိုးမြို့အတွင်းရှိ ရပ်ကွက် (၅)၊ ရပ်ကွက် (၁၂) နှင့် ခေးခမ်းရွာတို့တွင် နေအိမ်အချို့ အိမ်ထက်ဝက်ကျော်အထိ ရေဝင်ရောက်ခဲ့သဖြင့် ဘေးလွတ်ရာသို့ ပြောင်းရွှေ့နေထိုင်နေကြရသည်။ယင်းအပြင် ရှမ်းပြည်နယ် (မြောက်ပိုင်း) ရှိ အနီးဝန်းကျင်မြို့နယ်များဖြစ်သော သိန္နီမြို့နယ်နှင့် သီပေါမြို့နယ်တို့တွင်လည်း လယ်စပါးများ ရေနစ်မြှုပ်ခြင်း၊ မြေပြိုခြင်းများ ဖြစ်ပေါ်နေသဖြင့် သက်ဆိုင်ရာ ကူညီကယ်ဆယ်ရေးအဖွဲ့များက ကူညီဆောင်ရွက်ပေးလျက်ရှိသည်။ လမ်းခရီး သွားလာသူများအနေဖြင့်လည်း ရေကြီးနေမှုအခြေအနေ သတင်းများကို စုံစမ်းမေးမြန်း၍ သတိပြု သွားလာကြရန် ဒေသခံများက အသိပေးထားသည်။
