လာအိုနှင့်ဘောလုံးပွဲစဉ်တွင် အနီကတ်ပြသခံခဲ့ရသည့်အပေါ် ကိုယ့်ကိုယ်ကိုယ် စိတ်ပျက်မိကြောင်း မြန်မာအသင်းခေါင်းဆောင် မောင်မောင်လွင် ပြောကြား

မြန်မာ့လက်ရွေးစင် အမျိုးသားဘောလုံးအသင်း ခေါင်းဆောင် မောင်မောင်လွင်က လာအိုအသင်းနှင့် ယှဉ်ပြိုင်ကစားခဲ့သည့် ပွဲစဉ်အတွင်း အနီကတ်ပြသ ထုတ်ပယ်ခံခဲ့ရသည့် ဖြစ်စဉ်နှင့် ပတ်သက်၍ မိမိ၏ အပြုအမူအတွက် ကိုယ့်ကိုယ်ကိုယ် စိတ်ပျက်မိကြောင်း ပွင့်ပွင့်လင်းလင်း ထုတ်ဖော်ပြောကြားလိုက်သည်။ အဆိုပါပွဲစဉ်တွင် မြန်မာအသင်းခေါင်းဆောင် မောင်မောင်လွင်သည် အသင်းအတွက် အရေးပါသော ဦးဆောင်ဂိုးကို သွင်းယူပေးနိုင်ခဲ့သော်လည်း ပွဲချိန် ဒုတိယပိုင်း၌ ပြိုင်ဘက် လာအိုအသင်း ကစားသမား၏ ပြစ်ဒဏ်ကျူးလွန်မှု အပေါ် တုံ့ပြန်မိရာမှ အနီကတ်ပြသ၍ ကွင်းအတွင်းမှ ထွက်ခွာခဲ့ရခြင်း ဖြစ်သည်။