ဧရာဝတီတိုင်းဒေသကြီး၊ ပုသိမ်ခရိုင်၊ ဟိုင်းကြီးကျွန်းမြို့နယ် သက္ကယ်သောင်ကျေးရွာအုပ်စု အပါအဝင် ပင်လယ်ကမ်းရိုးတန်းတစ်လျှောက်ရှိ ကျေးရွာအသီးသီးတွင် ရိုးရာမပျက် နှစ်စဉ်ကျင်းပလေ့ရှိသည့် ဝါဆိုလှိုင်းခုန်ပွဲတော်ကို ဇူလိုင် ၃၀ ရက် နံနက်ပိုင်းက စည်ကားသိုက်မြိုက်စွာ ကျင်းပခဲ့သည်။ဝါဆိုလှိုင်းခုန်ပွဲတော်ကို နှစ်စဉ် ဝါဆိုလပြည့်ကျော် (၁) ရက်နေ့တွင် ကျင်းပခြင်းဖြစ်ပြီး ဟိုင်းကြီးကျွန်းမြို့နှင့် ကမ်းရိုးတန်းတစ်လျှောက် နေထိုင်ကြသော ဒေသခံများသည် မိသားစုများနှင့်အတူ ပင်လယ်ကမ်းခြေသို့ လာရောက်၍ ပျော်ရွှင်စွာ ပါဝင်ဆင်နွှဲကြသည်။ ယခုပွဲတော်သည် အချင်းချင်း ပိုမိုစည်းလုံးလာစေပြီး ချစ်ခင်ရင်းနှီးမှုကို ရရှိစေသည်ဟု ဒေသခံများက ခံယူထားကြသည်။ထို့ပြင် ဝါဆိုလှိုင်းခုန်ပွဲတော် ပျော်ရွှင်စွာ ဆင်နွှဲပြီးနောက် ညနေပိုင်းတွင် ဗုဒ္ဓမြတ်စွာဘုရားရှင်အား ရည်မှန်း၍ ပန်းမျိုးစုံ၊ အမွှေးနံ့သာမျိုးစုံတို့ဖြင့် ဘုန်းတော်ကြီးကျောင်းများသို့ သွားရောက် ပူဇော်လေ့ရှိကြောင်း သိရသည်။
