ရန်ကုန်တိုင်းဒေသကြီး၊ သာကေတမြို့နယ်၊ ငမိုးရိပ်ချောင်းဘေးရှိ သာကေတ မိကျောင်းမွေးမြူရေးစခန်းနှင့် မိကျောင်းများ ဥ ဥရာသီ လုပ်ငန်းစဉ်များ

ရန်ကုန်တိုင်းဒေသကြီး၊ သာကေတမြို့နယ်၊ ငမိုးရိပ်ချောင်းဘေးတွင် တည်ရှိသော သာကေတ မိကျောင်းမွေးမြူရေးစခန်းသည် သဘာဝပတ်ဝန်းကျင်နှင့် မိကျောင်း မျိုးဆက်ထိန်းသိမ်းရေး ဗဟုသုတများ လေ့လာနိုင်သည့် အရေးပါသော နေရာတစ်ခုဖြစ်ပြီး လက်ရှိတွင် မိကျောင်းများ ဥ ဥသည့် ရာသီသို့ ရောက်ရှိနေပြီဖြစ်သည်။ မွေးမြူရေးစခန်းအတွင်း ငမိုးရိပ်ချောင်းဘေးရှိ သဘာဝခြုံနွယ်များအကြားတွင် မိကျောင်းမကြီးများ ဥ ဥလေ့ရှိသော်လည်း သဘာဝအတိုင်း ထားရှိပါက ဖိမိခြင်းနှင့် အခြားအကြောင်းအမျိုးမျိုးကြောင့် သားပေါက်နှုန်း နည်းပါးလှကြောင်း သိရသည်။