ဧရာဝတီတိုင်း ငပုတောမြို့နယ်တွင် ဆရာမ၏ဓာတ်ပုံကို ညစ်ညမ်းစာသားဖြင့် TikTok ပေါ်တင်သည့် ကျောင်းသား ၃ ဦးကို အမှုဖွင့်တိုင်ကြား

ဧရာဝတီတိုင်းဒေသကြီး၊ ငပုတောမြို့နယ်၊ ဟိုင်းကြီးကျွန်းမြို့၊ ကံချိုင်ကျေးရွာ အထက်တန်းကျောင်းမှ အလယ်တန်းပြဆရာမတစ်ဦး၏ ဓာတ်ပုံကို မဖွယ်မရာညစ်ညမ်းစာသားများ ရေးသားကာ TikTok လူမှုကွန်ရက်ပေါ်တင်ခဲ့သည့် ကျောင်းသား ၃ ဦးကို ကာယကံရှင်ဆရာမက ရဲစခန်း၌ အမှုဖွင့်တိုင်ကြားထားကြောင်း သိရသည်။ ၎င်းညစ်ညမ်းစာသားပါဓာတ်ပုံ TikTok ပေါ်တွင် ပျံ့နှံ့နေသည်ကို သိရှိရပြီးနောက် ဆရာမဖြစ်သူက ကျောင်းအုပ်ကြီးထံ တင်ပြခဲ့သော်လည်း ကျောင်းအုပ်ကြီးနှင့် ကျောင်းသားမိဘများအကြား ပတ်သက်မှုများရှိနေသဖြင့် ကျောင်းပိုင်းမှတစ်ဆင့် အရေးယူပေးခြင်း မရှိခဲ့ပေ။ ထို့ကြောင့် နစ်နာသူဆရာမက မခံမရပ်နိုင်ဖြစ်ကာ ဟိုင်းကြီးကျွန်းမြို့ ရဲစခန်းသို့ ကိုယ်တိုင်သွားရောက်ကာ တရားဥပဒေအရ အမှုဖွင့်တိုင်ကြားခဲ့ခြင်းဖြစ်ကြောင်း ဒေသခံပညာရေးဝန်ထမ်းတစ်ဦး၏ ပြောပြချက်အရ သိရသည်။