ရန်ကုန်ကလေးဆေးရုံကြီး၌ ပခုက္ကူမှ အသက် ၂ နှစ်ခွဲအရွယ် ရင်ချင်းဆက်အမွှာ မိန်းကလေးနှစ်ဦးအား သီးခြားစီခွဲစိတ်မှု စတင်ပြုလုပ်နေ

မကွေးတိုင်းဒေသကြီး၊ ပခုက္ကူမြို့နယ်မှ အသက် (၂) နှစ် (၅) လအရွယ် ရင်ချင်းဆက်အမွှာ မိန်းကလေးနှစ်ဦးဖြစ်သည့် မကြာညိုသင်းနှင့် မကြာညိုသိမ့်တို့အား ရန်ကုန်ကလေးဆေးရုံကြီး၌ ဇွန်လ ၁၂ ရက် (ယနေ့) တွင် သီးခြားစီဖြစ်စေရန် ခွဲစိတ်ကုသမှု ပြုလုပ်ပေးလျက်ရှိကြောင်း သိရသည်။ အဆိုပါကလေးငယ်များသည် ယခုနှစ် ဇန်နဝါရီ ၆ ရက်ကတည်းက ဆေးရုံတက်ရောက်ကာ ကြိုတင်ပြင်ဆင်မှုများ ခံယူခဲ့ကြခြင်းဖြစ်ပြီး၊ ယခုခွဲစိတ်မှုကို ဆေးရုံအုပ်ကြီး ဒေါက်တာအောင်ထွန်းဦး၏ ကြီးကြပ်မှုဖြင့် ခွဲစိတ်ဆရာဝန်ကြီး ဒေါက်တာဒေါ်ညိုညိုဝင်း ဦးဆောင်သော ဆေးဘက်ဆိုင်ရာအဖွဲ့က တာဝန်ယူဆောင်ရွက်နေခြင်းဖြစ်ကာ ရန်ကုန်တိုင်းဒေသကြီးအစိုးရအဖွဲ့ ဝန်ကြီးများကလည်း ဆေးရုံသို့ သွားရောက်ကြည့်ရှုအားပေးခဲ့ကြကြောင်း သိရသည်။