ဓာတ်အားလိုင်း ထိန်းသိမ်းပြုပြင်မည်ဖြစ်သဖြင့် နေပြည်တော်နှင့် ပအိုဝ်းကိုယ်ပိုင်အုပ်ချုပ်ခွင့်ရဒေသတို့တွင် ဇွန် ၁၃ နှင့် ၁၄ ရက်၌ ယာယီဓာတ်အားပိတ်မည်

နေပြည်တော်နှင့် ပအိုဝ်းကိုယ်ပိုင်အုပ်ချုပ်ခွင့်ရဒေသတို့တွင် ဓာတ်အားပြတ်တောက်မှု လျော့နည်းစေရေးအတွက် သစ်ပင်သစ်ကိုင်းများ ခုတ်ထွင်ရှင်းလင်းခြင်းနှင့် ဓာတ်အားလိုင်း ပြောင်းရွှေ့သွယ်တန်းခြင်းလုပ်ငန်းများ ဆောင်ရွက်ရန်ရှိသဖြင့် ဇွန်လ ၁၃ ရက်နှင့် ၁၄ ရက်တို့တွင် သတ်မှတ်အချိန်အလိုက် ယာယီဓာတ်အားပိတ်ထားမည်ဖြစ်ကြောင်း သိရသည်။ နေပြည်တော်တွင် ဇွန်လ ၁၃ ရက်၌ ၃၃ ကေဗွီ Project M/O ဓာတ်အားလိုင်းကို နံနက် ၈ နာရီမှ မွန်းလွဲ ၃ နာရီအထိလည်းကောင်း၊ ပျဉ်းမနား-အေလာ ဓာတ်အားလိုင်းကို ခုံကျော်တံတားတည်ဆောက်ရေးအတွက် ပြောင်းရွှေ့သွယ်တန်းရန် နံနက် ၈ နာရီမှ ညနေ ၅ နာရီအထိလည်းကောင်း ပိတ်ထားမည်ဖြစ်ရာ အေလာမြို့နှင့် သာဝတ္တိမြို့တို့တွင် ဓာတ်အားပြတ်တောက်မည်ဖြစ်ပြီး၊ ဇွန်လ ၁၄ ရက်တွင်မူ MRTV-1 ဓာတ်အားလိုင်းကို နံနက် ၈ နာရီမှ မွန်းလွဲ ၃ နာရီအထိ ယာယီပိတ်ထားမည်ဖြစ်သည်။ အလားတူ ပအိုဝ်းကိုယ်ပိုင်အုပ်ချုပ်ခွင့်ရဒေသတွင်လည်း တောင်ကြီး-ဟိုပုံး၊ ဟိုပုံးနှင့် မိုင်းပွန်ဖီဒါ ဓာတ်အားလိုင်းများကို သစ်ပင်ရှင်းလင်းရန်ရှိသဖြင့် ဇွန် ၁၃ ရက်နှင့် ၁၄ ရက်တို့တွင် နံနက် ၉ နာရီမှ ညနေ ၄ နာရီအထိ ဓာတ်အားပိတ်ထားမည်ဖြစ်ရာ ဟိုပုံးမြို့၊ ကျောက်တန်းမြို့နှင့် မိုင်းပွန်မြို့တို့ရှိ ရပ်ကွက် ၁၁ ကွက်နှင့် ကျေးရွာ ၁၀၆ ရွာတို့တွင် ဓာတ်အားခေတ္တပြတ်တောက်မည်ဖြစ်ကြောင်း အသိပေးထုတ်ပြန်ထားသည်။