ရှမ်းပြည်တောင်ပိုင်း အောင်ပန်းမြို့၌ ကျူရှင်ခ တစ်လ ကျပ် ၁ သိန်းအထိ ရှိလာ၍ ကျောင်းသားမိဘများ အခက်ကြုံနေရ

ရှမ်းပြည်နယ်တောင်ပိုင်း၊ အောင်ပန်းမြို့ရှိ အခြေခံပညာကျောင်းများတွင် ကျောင်းအပ်နှံခ ကောက်ခံမှုမရှိသော်လည်း ဘာသာစုံကျူရှင်စရိတ်မှာ တစ်လလျှင် ကျပ်တစ်သိန်းဝန်းကျင်အထိ ကုန်ကျနေသဖြင့် အခြေခံလူတန်းစားနှင့် နေ့စားအလုပ်သမား မိသားစုများ ငွေကြေးအခက်အခဲနှင့် ဝန်ထုတ်ဝန်ပိုး ဖြစ်နေရကြောင်း ကျောင်းသားမိဘများထံက သိရသည်။လက်ရှိ ကုန်ဈေးနှုန်းမြင့်မားချိန်တွင် ကျောင်းဆရာ၊ ဆရာမများ၏ လစာမှာ ကျပ် ၃ သိန်းခွဲ၊ ၄ သိန်းဝန်းကျင်သာ ရှိသဖြင့် မလုံလောက်မှုကြောင့် အခကြေးငွေဖြင့် ကျူရှင်ပြသနေကြရခြင်း ဖြစ်သည်။ မိဘများအနေဖြင့် ကျူရှင်မတက်သည့် ကလေးများ ခွဲခြားဆက်ဆံခံရမည်ကို စိုးရိမ်ခြင်းနှင့် သားသမီးမျက်နှာမငယ်စေရန်အတွက် မဖြစ်မနေ ငွေကြေးရှာဖွေကာ ကျူရှင်ထားနေကြရကြောင်း ဒေသခံများက ဆိုသည်။ပညာရေးဌာနအနေဖြင့် အစိုးရကျောင်းဆရာ၊ ဆရာမများကို အခကြေးငွေဖြင့် ကျူရှင်မသင်ရန် တားမြစ်ထားပြီး တိုင်ကြားမှုများရှိလာပါက စိစစ်အရေးယူသွားမည်ဟု ထုတ်ပြန်ထားကြောင်း သိရသည်။