စစ်ကိုင်းတိုင်း၊ခန္တီးမြို့ရှိ ထမံသီ‌ဘေးမဲ့တောဘက်လာမည့် ခရီးသွားများကို နယ်မြေအခြေအနေကြောင့် ငြင်းပယ်နေရ

ယခင်က ပြည်တွင်းပြည်ပခရီးသွားများနှင့် သဘာဝပတ်ဝန်းကျင်ထိန်းသိမ်းရေးသမားများ စိတ်ဝင်စားခဲ့သည့် စစ်ကိုင်းတိုင်း၊ ခန္တီးခရိုင်ရှိ ထမံသီဘေးမဲ့တောလေ့လာရေးခရီးစဉ်များကို ယခုနှစ်အတွင်း လာရောက်လိုသူများ ရှိသော်လည်း နယ်မြေမတည်ငြိမ်မှုနှင့် ခရီးလမ်းပန်းခက်ခဲမှုတို့ကြောင့် ငြင်းပယ်နေရကြောင်း ဒေသခံများထံမှ သိရသည်။လက်ရှိတွင် ဟုမ္မလင်း၊ မော်လိုက်၊ ဖောင်းပြင်၊ ထမံသီနှင့် ခန္တီးဒေသများ၌ ကုန်းလမ်းနှင့် ရေလမ်းခရီးစဉ်များ အသုံးပြုရန် ခက်ခဲနေသဖြင့် အရေးပေါ်သွားလာရန်အတွက် ရံဖန်ရံခါပြေးဆွဲပေးသည့် ဟုမ္မလင်း-မန္တလေးနှင့် ခန္တီး-မန္တလေး လေကြောင်းလိုင်းများကိုသာ အဓိကအားထားနေရသည်။ထို့ပြင် ကုန်စည်စီးဆင်းမှုအတွက်လည်း ရေလမ်းခရီးတွင် အန္တရာယ်များပြားသဖြင့် လမ်းကြမ်းတမ်းသော မဟာမြိုင်လမ်းတစ်ခုတည်းကိုသာ အသုံးပြု၍ သွားလာနေရကြောင်း သိရသည်။