မွန်ပြည်နယ်တွင် သယ်ယူစရိတ်ကြီးမြင့်မှုကြောင့် ရာသီပေါ်သီးနှံများကို ကုန်ချောအဖြစ် ပြောင်းလဲရောင်းချမှု ပိုများလာ

မွန်ပြည်နယ်တွင် ဓာတ်မြေဩဇာခ၊ လုပ်သားခနှင့် သယ်ယူပို့ဆောင်ရေးစရိတ် (ရေးမှ မော်လမြိုင် ကားအသေးတစ်စီး ၃ သိန်းကျော်) ကြီးမြင့်နေသဖြင့် တောင်သူများသည် ရာသီပေါ်သီးနှံများကို အစိမ်းအတိုင်းမရောင်းတော့ဘဲ တန်ဖိုးမြှင့်ထုတ်ကုန် (ကုန်ချော) အဖြစ် ပြောင်းလဲရောင်းချလာကြကြောင်း သိရသည်။သရက်၊ နာနတ်၊ ဒူးရင်း စသည့် သီးနှံများကို သရက်ယို၊ ဖျော်ရည်နှင့် သစ်သီးခြောက်များအဖြစ် ကုန်ချောထုတ်လုပ်ကာ ကျိုက်ခမီနှင့် စက်စဲကမ်းခြေကဲ့သို့ ခရီးသွားစည်ကားရာနေရာများတွင် ရောင်းချနေကြသည်။ ကုန်ချောပြုလုပ်ခြင်းဖြင့် သိုလှောင်ရလွယ်ကူပြီး တစ်နှစ်ပတ်လုံးရောင်းရသဖြင့် ဈေးကွက်အတက်အကျဒဏ်ကို ခံနိုင်ရည်ရှိသော်လည်း လက်ရှိတွင် လျှပ်စစ်မီး၊ စက်ကိရိယာ၊ နည်းပညာနှင့် အရင်းအနှီး လိုအပ်ချက်များရှိနေဆဲ ဖြစ်သည်။မွန်ပြည်နယ်မှ ထွက်ကုန်အများစုမှာ ယခင်က ကုန်ကြမ်းအဖြစ်သာ ရောင်းချရသဖြင့် အမြတ်နည်းကာ စီးပွားရေးအရ တွက်ချေမကိုက်ဖြစ်ခဲ့ရပြီး၊ ယခု ကုန်ချောထုတ်လုပ်သည့်နည်းလမ်းမှာ တောင်သူများအတွက် စိန်ခေါ်မှုရှိသော်လည်း ဝင်ငွေတိုးလာနိုင်သည့် အလားအလာကောင်းတစ်ခု ဖြစ်နေကြောင်း သိရသည်။