နိုင်ငံခြားလူသုံးကုန်ပစ္စည်းများ တင်သွင်းရန် လတ်တလောကြုံတွေ့နေရသည့် အခက်အခဲများနှင့် ကုန်ဈေးနှုန်းမြင့်တက်မှုများကြောင့် စူပါမားကတ်နှင့် စတိုးဆိုင်ကြီးများတွင် ပြည်ပသွင်းကုန်များအစား ပြည်တွင်းထုတ်ကုန်များ အဓိကနေရာယူလာနေကြောင်း ဈေးကွက်အတွင်းမှ စုံစမ်းသိရှိရသည်။ယခင်က ထိုင်း၊ တရုတ်နှင့် ဗီယက်နမ်နိုင်ငံထုတ် ကုန်ပစ္စည်းများက ဈေးကွက်၏ ၇၀ ရာခိုင်နှုန်းကျော် နေရာယူထားသော်လည်း၊ လက်ရှိ ၂၀၂၆ ခုနှစ်အတွင်း သယ်ယူပို့ဆောင်ရေးစရိတ် မြင့်မားခြင်း၊ နယ်စပ်ကုန်သွယ်ရေးလမ်းကြောင်း ကြန့်ကြာခြင်းနှင့် ငွေလဲနှုန်းမတည်ငြိမ်ခြင်းတို့ကြောင့် ပြည်ပသွင်းကုန်အချို့ ပြတ်လပ်မှုများနှင့် ရင်ဆိုင်နေရသည်။ထို့ကြောင့် စတိုးဆိုင်ကြီးများသည် အရည်အသွေးကောင်းမွန်ပြီး ပုံမှန်ပံ့ပိုးပေးနိုင်သည့် ပြည်တွင်းထုတ် တစ်ကိုယ်ရေသန့်ရှင်းရေးနှင့် စားသောက်ကုန်ပစ္စည်းများကို ဈေးကွက်စင်ပေါ်များ၏ ၆၀ ရာခိုင်နှုန်းကျော်အထိ အစားထိုးနေရာပေးလာရသည်။
ယခုနောက်ပိုင်း ပြည်တွင်းဖြစ် လူသုံးကုန်ထုတ်လုပ်မှုကဏ္ဍသည် ၃၅ ရာခိုင်နှုန်းခန့် တိုးတက်လာပြီး ထုပ်ပိုးမှုနှင့် အရည်အသွေးပိုင်း တိုးတက်လာသော်လည်း၊ ဈေးကွက်အတွင်း အရောင်းအေးနေဆဲဖြစ်ကြောင်း သိရသည်။ စီးပွားရေးလေ့လာသူများကမူ ပြည်တွင်းဖြစ်အပေါ် စားသုံးသူများ၏ ယုံကြည်မှု (Brand Trust) ရရှိရန်နှင့် ဝယ်လိုအားတက်လာရန်အတွက် အရည်အသွေးကို စဉ်ဆက်မပြတ်ထိန်းသိမ်းကာ မားကတ်တင်းစနစ်တကျလုပ်ဆောင်ရန် လိုအပ်ကြောင်း အကြံပြုထားကြသည်။
