မကွေးတိုင်း၊ ဂန့်ဂေါမြို့နယ်မှ ချင်းပြည်နယ်တောင်ပိုင်းသို့ ဆက်သွယ်ထားသည့် လမ်းမကြီးတွင် မိုးကြီး၍ မြေပြိုမှုဖြစ်ပွားကာ လမ်းပိတ်နေ

မကွေးတိုင်းဒေသကြီး၊ ဂန့်ဂေါမြို့နယ်မှ ချင်းပြည်နယ်တောင်ပိုင်းသို့ ဆက်သွယ်ထားသည့် လမ်းမကြီးပေါ်တွင် ယခုတလော မိုးသည်းထန်စွာရွာသွန်းပြီး မြေပြိုမှုဖြစ်ပွားခဲ့ခြင်းကြောင့် လမ်းပိတ်ဆို့မှုဖြစ်ပွားနေကြောင်း သိရသည်။ မေလ ၃၀ ရက် ညပိုင်းမှစတင်ကာ မိုးအဆက်မပြတ် ရွာသွန်းခဲ့မှုကြောင့် ဂန့်ဂေါနှင့် ရေဇွာမြို့ကို ဆက်သွယ်ထားသည့် လမ်းမကြီး၊ ဂန့်ဂေါ-အိုက်ကားလမ်း ၄၆ မိုင်တောင်ပြိုနေရာ၌ မြေပြိုကျခဲ့ခြင်းဖြစ်ပြီး၊ လက်ရှိတွင် မိုး ဆက်လက်ရွာသွန်းနေဆဲဖြစ်၍ လမ်းပြန်လည်ပြုပြင်ရန် အဆင်မပြေသေးကြောင်း ဇိုတုန်ဖက်ဒရယ်ကောင်စီ၊ လမ်းပြုပြင်ရေးတာဝန်ခံ Salai Thomas က ပြောကြားသည်။ သို့သော်လည်း မိုးတိတ်သွားပါက နောက်ရက်တွင် လမ်းပြန်လည်ရှင်းလင်းနိုင်ရန် ပြင်ဆင်ထားပြီး လမ်းပွင့်ပါက ပြန်လည်အသိပေးသွားမည်ဖြစ်ကြောင်း သိရသည်။ အဆိုပါလမ်းပိုင်းသည် ချင်းပြည်နယ်တောင်ပိုင်းသာမက မြောက်ပိုင်း၊ လောက်တူဒေသ၊ ဇိုဖဲဒေသနှင့် ထန်တလန်မြို့နယ်အထိပါ ဆက်သွယ်ပေးထားသည့် အလွန်အရေးကြီးသော လမ်းမကြီးတစ်ခုဖြစ်ကြောင်း သိရသည်။