၂၀၂၆ ခုနှစ် မတ်လ ၂၆ ရက်နေ့မှာ ဘန်ကောက် မြို့တော်ဝန် Chadchart Sittipunt က Silom လမ်းမှာ ၃ ရက်ကြာ ကျင်းပမယ့် ကြီးကျယ်ခမ်းနားတဲ့ သင်္ကြန်ပွဲတော်ကို ပြင်ဆင်နေပြီး ဘန်ကောက်မြို့အနှံ့ နေရာပေါင်း ၈၀ ကျော်မှာလည်း ပွဲတော်တွေကို ကျင်းပသွားမှာ ဖြစ်တယ်လို့ ကြေညာပါတယ်။ Lan Khon Mueang နေရာကို ရိုးရာယဉ်ကျေးမှုဗဟိုချက်အဖြစ် သတ်မှတ်ထားပြီး Silom လမ်းကိုတော့ အဓိက ဖျော်ဖြေရေးနဲ့ ခရီးသွားဇုန်အဖြစ် ဆက်လက်ထားရှိသွားမှာ ဖြစ်ပါတယ်။ Silom လမ်းမှာ ကျင်းပမယ့် ပွဲကိုတော့ CPF နဲ့ ပူးပေါင်းပြီး "CP SPLASH TO SPACE" ဆိုတဲ့ အာကာသအပြင်အဆင်နဲ့ ခေတ်မီဆန်းသစ်တဲ့ ပုံစံမျိုး ကျင်းပသွားမှာ ဖြစ်ပါတယ်။လုံခြုံရေးအတွက် Silom လမ်း မှာ ဝင်ထွက်ပေါက် ၉ ခု၊ စစ်ဆေးရေးစနစ်တွေနဲ့ အရေးပေါ်လမ်းကြောင်းတွေကို တင်းကျပ်စွာ စီစဉ်ထားပါတယ်။ လာရောက်လည်ပတ်သူတွေအနေနဲ့ ပေါင်ဒါမှုန့်တွေ မသုံးဖို့၊ သင့်လျော်အောင် ဝတ်စားဆင်ယင်ဖို့၊ သူတစ်ပါး အခွင့်အရေးကို လေးစားဖို့နဲ့ အဲဒီနေရာကို သန့်ရှင်းရေး ဝိုင်းဝန်းထိန်းသိမ်းပေးကြဖို့ကိုလည်း အထူးမေတ္တာရပ်ခံထားပါတယ်။CPF ရဲ့ အမှုဆောင်အရာရှိချုပ် Prasit Boondoungprasert က Silom လမ်းသင်္ကြန်ပွဲတော်ကို ၂၀၂၆ ခုနှစ် ဧပြီလ ၁၂ ရက်ကနေ ၁၄ ရက်အထိ ၃ ရက်တိတိ တိုးချဲ့ကျင်းပသွားမယ်လို့ ပြောပါတယ်။ အာကာသအပြင်အဆင် ဖျော်ဖြေရေး အစီအစဉ်တွေ အများကြီး ပါဝင်မှာဖြစ်ပြီး ပြည်တွင်းပြည်ပ ခရီးသွားတွေ အများကြီး လာရောက်ကြမယ်လို့ မျှော်မှန်းထားတဲ့အတွက် ဘန်ကောက်ရဲ့ စီးပွားရေးကိုလည်း အများကြီး အထောက်အကူ ဖြစ်စေမှာ ဖြစ်ပါတယ်။
