ဟဲဟိုးတွင် တန် ၂၀၀၀ ဆံ့ မျိုးအာလူး အအေးခန်းသိုလှောင်ရုံ ဖွင့်လှစ်

ရှမ်းပြည်နယ်၊ ဟဲဟိုးမြို့တွင် ဒေသတွင်း မျိုးအာလူးလိုအပ်ချက်ကို ဖြည့်ဆည်းပေးနိုင်မည့် တန် ၂၀၀၀ ဆံ့ မျိုးအာလူးအအေးခန်းသိုလှောင်ရုံသစ်ကို ဇန်နဝါရီလ ၂၇ ရက်နေ့က ဖွင့်လှစ်ခဲ့ကြောင်း သိရသည်။ Myanmar United Farmers Agriculture Co., Ltd. က တာဝန်ယူတည်ဆောက်ခဲ့သော အဆိုပါသိုလှောင်ရုံကြောင့် တောင်သူများအနေဖြင့် အရည်အသွေးမြင့် မျိုးကောင်းမျိုးသန့်များကို ဈေးနှုန်းချိုသာစွာဖြင့် အလွယ်တကူ ဝယ်ယူစိုက်ပျိုးနိုင်တော့မည်ဖြစ်ကြောင်း ပြည်နယ်ဝန်ကြီးချုပ် ဦးအောင်အောင်က ပြောကြားခဲ့သည်။ တစ်နိုင်ငံလုံး အာလူးစိုက်ဧရိယာ၏ ၆၀ ရာခိုင်နှုန်းကျော်ရှိသော ရှမ်းပြည်နယ်တွင် ယခုအခါ ဟဲဟိုး၊ နောင်တရား၊ အောင်ပန်းနှင့် ပင်းတယမြို့တို့၌ အအေးခန်းသိုလှောင်ရုံများ အသီးသီးဖွင့်လှစ်ထားရှိပြီးဖြစ်ရာ မျိုးအာလူးများ ပျက်စီးဆုံးရှုံးမှုကို လျှော့ချပေးနိုင်ကာ အထွက်နှုန်းကောင်းမွန်စေရန် အထောက်အကူပြုမည်ဖြစ်ကြောင်း သိရှိရပါသည်။