သရုပ်ဆောင် သင်ဇာဝင့်ကျော်အား ပုဒ်မ ၂၉၄(က) ဖြင့် အမှုဖွင့်ထားမှုအပေါ် ရုပ်ရှင်အစည်းအရုံးသို့ အကြောင်းကြားလာခြင်း မရှိသေး

သရုပ်ဆောင် သင်ဇာဝင့်ကျော်သည် ဇန်နဝါရီ ၁၅ ရက်က နိုဗိုတယ်ဟိုတယ်တွင် ကျင်းပသည့် မွေးနေ့ပွဲနှင့် ဇာတ်ကားမိတ်ဆက်ပွဲ၌ အများပြည်သူအမြင်မတင့်တယ်သည့် အဝတ်အစားများဖြင့် ကပြဖျော်ဖြေခဲ့သည်ဟုဆိုကာ ရာဇသတ်ကြီးပုဒ်မ ၂၉၄(က) ဖြင့် ကမာရွတ်မြို့နယ်ရဲစခန်းတွင် အမှုဖွင့်ခံထားရသော်လည်း အဆိုပါကိစ္စနှင့်ပတ်သက်၍ မြန်မာနိုင်ငံရုပ်ရှင်အစည်းအရုံးသို့ တစ်စုံတစ်ရာ အကြောင်းကြားလာခြင်း မရှိသေးကြောင်း သိရသည်။ အဆိုပါပုဒ်မသည် အများပြည်သူဆိုင်ရာနေရာတွင် ညစ်ညမ်းသောပြုလုပ်မှုအတွက် ထောင်ဒဏ် ၃ လဖြစ်စေ၊ ငွေဒဏ်ဖြစ်စေ ချမှတ်နိုင်သည့် အာမခံပေးနိုင်သောပုဒ်မဖြစ်သော်လည်း၊ ၎င်းသည် ၂၀၂၅ ခုနှစ် ဇန်နဝါရီ ၄ ရက်ကမှ လွတ်ငြိမ်းသက်သာခွင့်ဖြင့် ပြန်လည်လွတ်မြောက်လာသူဖြစ်ရာ နောက်ထပ်ပြစ်ဒဏ်ကျခံရပါက ယခင်ကျန်ရှိနေသော ပြစ်ဒဏ်များကိုပါ တစ်ပေါင်းတည်း ပြန်လည်ကျခံရနိုင်ဖွယ်ရှိကြောင်း ဥပဒေအရ သုံးသပ်မှုများ ထွက်ပေါ်နေပါသည်။