ထိုင်းနိုင်ငံ၊ ချွန်ဘူရီခရိုင်အတွင်းရှိ ဂျွန်တီယန်နှင့် သက်ပရာဆစ်ဒေသရှိ ဆောက်လုပ်ရေးလုပ်သား အခြေစိုက်စခန်းနှစ်ခုကို ဇန်နဝါရီ ၁၆ ရက်က လူဝင်မှုကြီးကြပ်ရေးဌာနနှင့် ခရီးသွားရဲတပ်ဖွဲ့တို့ ပူးပေါင်း၍ ရှောင်တခင်ဝင်ရောက်စစ်ဆေးခဲ့ရာ မြန်မာနှင့် ကမ္ဘောဒီးယားအလုပ်သမား ၆၀၀ ကျော်အနက် နေထိုင်ရာလိပ်စာအကြောင်းကြားရန် ပျက်ကွက်သူ (ပုဒ်မ ၃၈) အယောက် ၂၀၀ ကျော်၊ ရက် ၉၀ အစီရင်ခံရန် ပျက်ကွက်သူ ၆ ဦးနှင့် အလုပ်ရှင်အမည် မတူညီဘဲ အလုပ်လုပ်ကိုင်သူ ၇ ဦးတို့ကို ဖမ်းဆီးအရေးယူခဲ့ကြောင်း သိရသည်။ အဆိုပါစစ်ဆေးမှုတွင် နိုင်ငံအတွင်း တရားမဝင်ဝင်ရောက်လာသူနှင့် ဗီဇာသက်တမ်းကျော်လွန်နေထိုင်သူများ မတွေ့ရှိရသော်လည်း လူဝင်မှုကြီးကြပ်ရေးဆိုင်ရာ လုပ်ထုံးလုပ်နည်း ချိုးဖောက်သူများအား ဥပဒေအရ စွဲချက်တင်ခဲ့ကြောင်း သိရှိရပါသည်။
