ထိုင်းနိုင်ငံတောင်ပိုင်း၊ နရာသီဝပ် (Narathiwat) ပြည်နယ်အတွင်းမှာ ဗုံးဖောက်ခွဲတိုက်ခိုက်မှုတွေအပါအဝင် အကြမ်းဖက်မှုတွေ ဆက်တိုက်ဖြစ်ပွားခဲ့တာကြောင့် အဲဒီဒေသမှာ ညမထွက်ရ(ကာဖြူး)အမိန့်ကို ချက်ချင်းထုတ်ပြန်လိုက်တယ်လို့ ထိုင်းစစ်တပ်က ဇန်နဝါရီ ၁၁ ရက်၊ မနေ့က ကြေညာလိုက်ပါတယ်။နာရာသီဝပ်ဒေသဆိုင်ရာ အထူးတပ်ဖွဲ့ရဲ့ လူမှုကွန်ရက်စာမျက်နှာကနေ ထုတ်ပြန်တဲ့ အထက်ပါကြေညာချက်အရ ပြည်သူတွေရဲ့ ဘေးကင်းလုံခြုံရေးနဲ့ နယ်မြေတည်ငြိမ်ရေးအတွက် လုပ်ငန်းစဉ်အတော်များများကို လုပ်ဆောင်သွားမယ်လို့ သိရပါတယ်။ အဲဒီထဲမှာ ထိုင်း-မလေးရှားနယ်စပ်ဂိတ်တွေကို အထူးတင်းကျပ် စစ်ဆေးသွားမှာဖြစ်သလို၊ နာရာသီဝပ်ပြည်နယ်အတွင်း ည ၉ နာရီကနေ မနက် ၅ နာရီအထိ အပြင်မထွက်ရအမိန့် ထုတ်ပြန်တာလည်း ပါဝင်ပါတယ်။
