ပြည်တွင်း၌ပလတ်စတစ်မှဒီဇယ်ထုတ်လုပ်မှု မိတ္ထီလာ၌ လက်တွေ့လုပ်ဆောင်ပြသဟုဆို

ပြည်တွင်း၌ပလတ်စတစ်မှ ဒီဇယ်ထုတ်လုပ်မှုကို မိတ္ထီလာမြို့တွင် ဌာနဆိုင်ရာများကိုဖိတ်ကြား၍ လက်တွေ့လုပ်ဆောင်ပြသခဲ့ကြောင်း ဒေသခံများထံမှ သိရသည်။အဆိုပါလုပ်ဆောင်ပြသမှုကို မိတ္ထီလာမြို့နယ်၊ ကျီတော်ကုန်းရပ်ကွက်တွင်နေထိုင်သော ကိုစောမြင့်သိန်းဆိုသူမှ ၎င်း၏နေအိမ်သို့ဌာနဆိုင်ရာများဖိတ်ကြားပြီး ဒီဇင်ဘာ ၂၂ ရက်က လက်တွေ့စမ်းသပ်ပြုလုပ်ပြသခဲ့ခြင်းလည်းဖြစ်သည်။ ၎င်းသည် ထိုင်းနိုင်ငံတွင်နှစ်ပေါင်းများစွာနေထိုင်၍ ပလတ်စတစ်အမှိုက်မှ ဒီဇယ်ထုတ်လုပ်မှုနှင့်သက်ဆိုင်သော အလုပ်မျိုးကို လုပ်ကိုင်လာခဲ့သူဖြစ်ပြီး ယင်းအတွေ့အကြုံကိုယူဆောင်လာကာ ယခုကဲ့သို့လက်တွေ့ပြသခြင်းလည်းဖြစ်သည်။ထိုင်းနိုင်ငံမှယူဆောင်လာသော စွန့်ပစ်ပလတ်စတစ် ဒီဇယ်ထုတ်ပေါင်းအိုးများဖြင့် ဒီဇယ်ထုတ်လုပ်မှုကိုစမ်းသပ်ရာတွင် ပလတ်စတစ် ၃၀ ကီလိုဂရမ်လျှင် ဒီဇယ် ၂၇ လီတာထွက်ရှိသည်ကို လက်တွေ့လုပ်ဆောင်ပြသခဲ့ခြင်းဖြစ်ပြီး လူမှု့ရေးအသင်းအဖွဲ့များအနေဖြင့် ရန်ပုံငွေရှာဖွေပြုလုပ်လိုပါက ပစ္စည်းတန်ဖိုးသယ်ယူစရိတ်ပေါင်းတွက်ပြီး နည်းပညာမျှဝေပေးရန်လည်း ရည်ရွယ်ထားကြောင်း သိရသည်။ပြည်တွင်းရှိ ဒေသအများစုတွင် စွန့်ပစ်အမှိုက်များကို ကျင်းတူး၍မြှုပ်ခြင်းနည်းဖြင့်သာ ဖြေရှင်းမှုများပြားပြီး အချို့မှာ မီးရှို့လုပ်ဆောင်ခြင်းကြောင့် လေထုညစ်ညမ်းမှုများလည်းကြုံတွေ့လျက်ရှိရာ ယခုလိုစွန့်ပစ်အမှိုက် ဖြေရှင်းနိုင်မည့်နည်းလမ်း အတွက် ဒေသခံများကြား စိတ်ဝင်စားမှုများနေကြောင်းလည်း သိရသည်။