ဘန်ကောက်မှာ နှစ်သစ်ကူး မီးရှူးမီးပန်း ပစ်ဖောက်မှုအတွက် စည်းမျဉ်းထုတ်ပြန်

ဘန်ကောက်မြို့တော် အုပ်ချုပ်ရေးဌာနက ၂၀၂၆ ခုနှစ် နှစ်သစ်ကူး Countdown ကာလအတွင်း မီးရှူးမီးပန်းနှင့် မီးပုံးပျံ လွှတ်တင်မှုများကို နယ်မြေခရိုင် ၅၀ အားလုံး၌ ခွင့်ပြုချက်ပေးသည့် စံနှုန်းများအတိုင်း တင်းတင်းကြပ်ကြပ် ဆောင်ရွက်ရန် ညွှန်ကြားလိုက်သည်။ အဆိုပါ လုပ်ဆောင်မှုများကြောင့် မကြာခဏ ပေါက်ကွဲမှုများနှင့် မီးလောင်မှုများ ဖြစ်ပွားလေ့ရှိသည့်အတွက် ယခုကဲ့သို့ စည်းမျဉ်းထုတ်ပြန်ခြင်းဖြစ်ကြောင်း BMA တာဝန်ရှိသူ Narong Ruangsri က ပြောကြားခဲ့သည်။ စည်းမျဉ်းအရ လျှောက်ထားသူများသည် အသက် ၂၀ အထက် ထိုင်းနိုင်ငံသား ဖြစ်ရမည့်အပြင်၊ လှုပ်ရှားမှုမပြုလုပ်မီ အနည်းဆုံး ၁၅ ရက် ကြိုတင်တင်ပြရမည်ဖြစ်ပြီး၊ ခွင့်ပြုချက်ရသူများအတွက်လည်း မီးရှူးမီးပန်းလွှတ်တင်ခြင်းကို ဒီဇင်ဘာ ၃၁ ရက် ည ၁၁ နာရီမှ ဇန်နဝါရီ ၁ ရက် မနက် ၁ နာရီအထိသာ ခွင့်ပြုမည်ဖြစ်သည်။ ခွင့်ပြုချက်မရှိဘဲ ဖောက်သူများကို ထောင်ဒဏ် ၃ နှစ်အထိ သို့မဟုတ် ငွေဒဏ် ဘတ် ၆၀,၀၀၀ အထိ ချမှတ်ခံရနိုင်ကြောင်းလည်း အသိပေးထားသည်။