ထန်းတပင်မြို့နယ်တွင် နွေစပါးမျိုးစေ့ချကိရိယာ (Drum Seeder) ဖြင့် စိုက်ပျိုးနည်းစနစ်များ လက်တွေ့ပြသ

ရန်ကုန်တိုင်းဒေသကြီး၊ မှော်ဘီခရိုင်၊ ထန်းတပင်မြို့နယ်အတွင်းရှိ တောင်သူများအား စပါးအထွက်နှုန်းတိုးတက်စေရေးနှင့် စိုက်ပျိုးနည်းစနစ်များ မှန်ကန်စေရေးအတွက် နွေစပါးမျိုးစေ့ချကိရိယာ (Drum Seeder) ဖြင့် နွေစပါး လက်တွေ့စိုက်ပျိုးပြသခြင်းနှင့် တောင်သူပညာပေးဆွေးနွေးပွဲကို ဒီဇင်ဘာ ၁၁ ရက်နေ့ နံနက်ပိုင်းက လမုတန်းကြီးကျေးရွာတွင် ကျင်းပပြုလုပ်ခဲ့သည်။ အဆိုပါဆွေးနွေးပွဲတွင် မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ နှင့် ရွှေဇာခြည်ဘိုကလေးကုမ္ပဏီမှ ဦးသောင်းဝင်းတို့က အမှာစကားများပြောကြားခဲ့ပြီး၊ မြို့နယ်စိုက်ပျိုးရေးဦးစီးဌာနမှူး ဦးစောဝင်းကိုက စိုက်ပျိုးနည်းစနစ်မှန်ကန်ရေးနှင့် စပါးအထွက်နှုန်းတိုးပွားရေးတို့ကို တောင်သူများအား အသိပညာပေးရှင်းလင်းပြောကြားခဲ့သည်။ ထို့နောက် မြို့နယ်စိုက်ပျိုးရေးဦးစီးဌာန ဝန်ထမ်းများက နယူတန်မျိုးစပါးကို Drum Seeder ဖြင့် ဒေသခံတောင်သူများကို လက်တွေ့စိုက်ပျိုးပြသပေးခဲ့ကြောင်း သိရသည်။