အမေရိကန်သမ္မတဒေါ်လ်နယ်ထရမ့်က ဥရောပတိုက်ကြီးသည် ပျက်စီးယိုယွင်းနေပြီဟုပြောခဲ့ပြီးနောက် ဥရောပသည် အင်အားတောင့်တင်းမှုရှိကြောင်း ၎င်း၏လွတ်လပ်မှုနှင့် ဒီမိုကရေစီတန်ဖိုးများအတွက် သူရပ်ခံသွားမှာဖြစ်ကြောင်း ဗြိတိန်ဝန်ကြီးချုပ်ကီယာစတာမာက ဗုဒ္ဓဟူးနေ့တွင်ပြောကြားလိုက်သည်။အင်္ဂါနေ့က Politico နှင့်အင်တာဗျူးတစ်ခုတွင် ထရမ့်က ဥရောပနိုင်ငံရေးခေါင်းဆောင်များကို အားနည်းနေသူတွေအဖြစ်ဆိုလိုက်ပြီး ယူကရိန်းစစ်ပွဲအဆုံးသတ်နိုင်ခြင်းမရှိသည့်အတွက် ဥရောပကို ပြစ်တင်ရှုတ်ချခဲ့ သည်။ယခင်သီတင်းပတ်က ဥရောပသည် ယဉ်ကျေးမှုဆိုင်ရာပျက်စီးမှုနဲ့ရင်ဆိုင်နေရပြီး လမ်းကြောင်းကို ပြောင်းလဲပစ်ရမည်ဟုသတိပေးထားသည့် အမေရိကန်အမျိုးသားလုံခြုံရေးမဟာဗျူဟာထုတ်ပြန်ခဲ့ပြီးနောက် ထရမ့်၏ပြောကြားချက် ထွက်ပေါ်လာခဲ့ခြင်းဖြစ်သည်။ကျွန်တော်မြင်တွေ့နေတာက အင်အားတောင့်တင်းတဲ့ဥရောပ၊ ယူကရိန်းရဲ့နောက်မှာစည်းလုံးညီညွတ်တဲ့၊ ကျွန်တော်တို့ကာလရှည်ကြာရပ်ခံခဲ့ကြတဲ့ လွတ်လပ်မှုနဲ့ဒီမိုကရေစီတန်ဖိုးတွေရဲ့နောက်မှာ စည်းလုံးညီညွတ်မှုရှိနေကြတဲ့ ဥရောပပဲဖြစ်ပါတယ်၊ ကျွန်တော်အဲဒီလွတ်လပ်မှုတွေကို အမြဲတမ်းရပ်ခံသွားမှာဖြစ်ပါတယ် ”ဟု စတာမာက အမေရိကန်အမျိုးသားလုံခြုံရေးမဟာဗျူဟာနှင့်ပတ်သက်ပြီး ပါလီမန်တွင် ဗြိတိန်အမတ်တစ်ဦး၏ မေးမြန်းချက်ကို ပြန်လည်ဖြေကြားရာမှာထည့်သွင်းပြောကြားသွားခဲ့သည်။ထရမ့်က Politico နှင့်အင်တာဗျူးတွင် လန်ဒန်မြို့တော်ဝန်ဆာဒိခန်းကိုလည်း ကပ်ဆိုးကြီးတစ်ခုဟု ရည်ညွှန်းပြောသွားခဲ့သည်။ စတာမာ၏ဗဟိုလက်ဝဲ လေဘာပါတီကို ကိုယ်စားပြုသည့် ခန်းသည် ၂၀၁၆ ခုနှစ်တွင် လန်ဒန်မြို့တော်ဝန်အဖြစ်ရွေးချယ်တင်မြှောက်ခံရသည့် ပထမဆုံးမူဆလင်တစ်ဦးဖြစ်လာခဲ့သည်။အမေရိကန်သမ္မတသည် ခန်းအားကာလရှည်ကြာကတည်းက ပြစ်တင်ဝေဖန်မှုများပြုလုပ်ခဲ့ပြီး မကြာသေးခင်နှစ်ပိုင်းအတွင်း ၎င်းတို့နှစ်ဦးသည် အကြိမ်ကြိမ်တိုက်ခိုက်မှုများဖြစ်ပွားခဲ့သည်။စတာမာ၏သတင်းထုတ်ပြန်ရေးအဖွဲ့အတွင်းရေးမှူးက ထရမ့်၏ပြောကြားချက်များမှားယွင်းကြောင်းဆိုလိုက်ပြီး ခန်း၏စံချိန်မှတ်တမ်းကို ခုခံကာကွယ်သွားခဲ့သည်။
