မုံရွာမြို့ သာစံကျောင်းတိုက်မှ သက်တော် ၁၀၂ နှစ်ရှိ ရာကျော်ဆရာတော်ကြီး၏ အန္တိမအဂ္ဂိစျာပနပူဇာ ချင်းတွင်းမြစ်သဲသောင်ပြင်၌ ကျင်းပ

စစ်ကိုင်းတိုင်းဒေသကြီး၊ မုံရွာမြို့၊ သာစံကျောင်းတိုက်၏ ဦးစီးပဓာန နာယက၊ သက်တော် (၁၀၂) နှစ်၊ ဝါတော် (၈၂) ဝါရှိ ရာကျော်သာစံဆရာတော်ဘုရားကြီး၏ အန္တိမအဂ္ဂိစျာပနပူဇာ အခမ်းအနားကို ဒီဇင်ဘာ ၇ ရက်၊ မွန်းလွဲ ၂ နာရီခွဲတွင် ကျင်းပခဲ့သည်။ ဆရာတော်ကြီး၏ ရုပ်ကလာပ်တော်ကို ချင်းတွင်းမြစ်သဲသောင်ပြင်သို့ ပင့်ဆောင်ကာ ညနေ ၃ နာရီခွဲတွင် မီးပူဇော်ခဲ့ကြပြီး၊ ဒီဇင်ဘာ ၆ ရက်နေ့မှစ၍ ကျင်းပခဲ့သည့် အခမ်းအနားများတွင် ရုပ်ကလာပ်တော် စံကျောင်းချပွဲနှင့် ဇင်မာအောင် (အားမာန်သစ်အငြိမ့်) အဖွဲ့က ဧယာဉ်ကျူးနှင့် အငြိမ့်ကပြဖျော်ဖြေမှုများ ပါဝင်ခဲ့သည်။ ဒီဇင်ဘာ ၈ ရက်တွင် ဆရာတော်ကြီး၏ အရိုးတော်နှင့် ပြာတော်များကို ကောက်ယူကာ ကရဝိတ်ဖောင်တော်ဖြင့် ချင်းတွင်းမြစ်အနောက်ဘက်ကမ်းရှိ ဆရာတော်ကြီး၏ ဇာတိဖြစ်သော မိုးကြိုးပြင်ရွာသို့ ပင့်ဆောင်သွားမည်ဖြစ်ကြောင်း သိရသည်။