တိုကျိုရှိ မြန်မာသံရုံးတွင် အချက်အလက်မပြည့်စုံသည့် နိုင်ငံကူးလက်မှတ် သက်တမ်းတိုးလျှောက်လွှာ ၉၀၀ ကျော်ရှိနေ

ဂျပန်နိုင်ငံ၊ တိုကျိုမြို့ရှိ မြန်မာသံရုံးက နိုဝင်ဘာ ၂၆ ရက်နေ့တွင် ထုတ်ပြန်ကြေညာသည်မှာ အချက်အလက်မပြည့်စုံသည့် နိုင်ငံကူးလက်မှတ် (Passport) သက်တမ်းတိုး လျှောက်လွှာ ၉၀၀ ခန့် ရှိနေပြီး၊ ထိုလျှောက်လွှာများကို ဆက်လက်ဆောင်ရွက်နိုင်ခြင်းမရှိဘဲ ကြန့်ကြာမှုများ ဖြစ်ပေါ်နေကြောင်း သိရသည်။ ထို့ကြောင့် သံရုံးအနေဖြင့် ဒီဇင်ဘာ ၁ ရက်မှ ၁၂ ရက်အထိကို စီမံချက်ကာလအဖြစ် သတ်မှတ်ကာ တာဝန်ရှိသူများက လျှောက်ထားသူများကို တိုက်ရိုက်ဆက်သွယ်ပြီး လိုအပ်သည့် အချက်အလက်များကို ထပ်မံတောင်းခံသွားမည်ဖြစ်သည်။ ထို့ပြင် စာရွက်စာတမ်း ပြည့်စုံသူများအတွက် ၂၀၂၆ ခုနှစ် ဇန်နဝါရီ ၂ ရက်မှစတင်ကာ အချိန်တိုအတွင်း နိုင်ငံကူးလက်မှတ် သက်တမ်းတိုး ဆောင်ရွက်ပေးရန်လည်း စီမံချက်များ ချမှတ်ထားကြောင်း သိရသည်။