ကွယ်လွန်သွားတဲ့ တေးသံရှင် ဗစ်တာခင်ညိုရဲ့ ဈာပနကို စက်တင်ဘာ ၂၇ ရက်မှာ ရေဝေးသုသာန်ကို ပို့ဆောင်သဂြိုလ်မယ်လို့ ကျန်ရစ်သူ မိသားစုက သိရပါတယ်။ဦးသိန်းထွန်း (ခေါ် ) ဦးဗစ်တာခင်ညို အသက် (၈၀) နှစ်ဟာ ၂ဝ၂၅ ခုနှစ်၊ စက်တင်ဘာလ (၂၅) ရက်၊ မနက် (၇) နာရီမှာ (၉၆) ပါးရောဂါနဲ့ ဘဝတစ်ပါးကို ကူးပြောင်းသွားတာကြောင့် ၂ဝ၂၅ ခုနှစ်၊ စက်တင်ဘာလ (၂၇) ရက်၊ စနေနေ့ မွန်းလွဲ ၁ နာရီ ၃ဝ မိနစ် အချိန်မှာ ကြွင်းကျန်တဲ့ ရုပ်ကလာပ်ကို ရေဝေးသုသာန်မှာ ပို့ဆောင်သဂြိုလ်မှာ ဖြစ်ပါတယ်။ဗစ်တာခင်ညို ဟာ ကွယ်လွန်ချိန်မှာ အသက် ၈၀ ရှိပြီ ဖြစ်ကာ ဇနီးနဲ့ သား ၃ ဦး ကျန်ရစ်ခဲ့ပါတယ်။ သူ့ရဲ့ နာရေးကို ရန်ကုန်မြို့ ၊ ကန်တော်လေး က ဒေါ်သိန်းတင်လမ်း နေအိမ်မှာ ပြုလုပ်ဖို့ စီစဥ်ထားပြီး စက်တင်ဘာ ၂၇ ရက်မှာ သူ့ရဲ့ ဈာပနကို ပြုလုပ်မှာ ဖြစ်ပါတယ်။ကိုယ်ပိုင်သံစဥ်တေးသီချင်းများစွာကို သီဆိုခဲ့တဲ့ ဗစ်တာခင်ညိုဟာ နွေ၊ မြခွာညို၊ ဒီဇင်ဘာနံနက်ခင်း၊ ကြွေရုပ်ကလေးနဲ့ ဒုတိယလူ စတဲ့ တေးသီချင်းတွေနဲ့ ကိုယ့်အပြစ်နဲ့ကိုယ်ဆက်၍ငိုမယ်နဲ့ လိုက်ခဲ့တော့၊ နွေသာဆိုရင်မှာပြာ၊ တို့ရဲ့နောက်ဆုံးအချိန်၊ကျူရှင်လှေကားရင်း သီချင်းတွေက လူကြိုက်များ ထင်ရှားတယ်လို့ သိရပါတယ်။
