အင်းလေးဖောင်တော်ဦးဘုရားပွဲတော်ကို ရှမ်းပြည်နယ်တောင်ပိုင်း၊ ညောင်ရွှေမြို့နယ်ရှိ အင်းလေးဒေသ ၂၁ ဌာနသို့ ရိုးရာအစဉ်အလာအတိုင်း ၁၈ ရက်တိုင်တိုင် ဒေသစာရီကြွချီ လှည့်လည် အပူဇော်ခံသွားမှာဖြစ်ပြီး ရိုးရာလှေလှော်ပြိုင်ပွဲများပါ ထည့်သွင်းကျင်းပသွားမှာဖြစ်တယ်လို့ အင်းလေးဖောင်တော်ဦးမြတ်စွာဘုရား ထိန်းသိမ်းစောင့်ရှောက်ရေး ဂေါပကအဖွဲ့ထံမှ သိရပါတယ်။အဆိုပါ ဘုရားပွဲတော်အစီအစဉ်အရ စက်တင်ဘာ ၂၂ ရက်နေ့ (သီတင်းကျွတ်လဆန်း ၁ ရက်နေ့) မှာ မူလသီတင်းသုံးစံပယ်တော်မူရာ ရတနာစံကျောင်တော်မှာ ရောင်တော်ဖွင့်ခြင်း၊ အနေကဇာတင်ခြင်းများကျင်းပပြီး ယင်းမှတစ်ဆင့် ကရဝိတ်ဖောင်တော်ဖြင့် အင်းတိန်ကြေးပေါခုံ ကျောင်းသို့ စတင်ပင့်ဆောင်ပူဇော်မှာဖြစ်ကြောင်း၊ စက်တင်ဘာလ ၂၈ ရက်နေ့ (သီတင်းကျွတ်လဆန်း ၇ ရက်)နံနက်ပိုင်းမှာ ညောင်ရွှေမြို့သို့ ဆိုက်ရောက်ပြီး ၃ ရက်ကြာ ကိန်းဝပ်အပူဇော်ခံသွားမည်ဖြစ်ကြောင်းနှင့် အောက်တိုဘာလ ၉ ရက်နေ့ (သီတင်းကျွတ် လပြည့်ကျော် ၃ ရက်)မှာ မူလသီတင်းသုံးရာနေရာ ရတနာစံကျောင်းတော်သို့ ပြန်လည်ကြွချီ၍ စံကျောင်းတော်ဝင်ပွဲ ပြန်လည်ကျင်းပသွားမှာဖြစ်ပါတယ်။ အင်းသား ရိုးရာလှေလှော်ပြိုင်ပွဲများကို ထည့်သွင်းကျင်းပသွားမှာဖြစ်ပြီး အကြိုပွဲစဉ်များအဖြစ် စက်တင်ဘာလ ၂၆ ရက်နေ့(သီတင်းကျွတ်လဆန်း ၅ ရက်)မှာ ရေလယ်ဧည့်ခန်းမအရှေ့ ရေပြင်ကျယ်မှာ ကျင်းပသွားမှာဖြစ်ကာ ညောင်ရွှေမြို့သို့ ဆိုက်ရောက်တဲ့ စက်တင်ဘာ ၂၈ ရက်နေ့၌ နန်းကပ်ချောင်းမှာ ကျင်းပသွားမှာဖြစ်သလို အောက်တိုဘာလ ၈ ရက်နေ့နဲ့ ၉ ရက်နေ့တို့မှာ အင်းလေးဖောင်တော်ဦးမြတ်စွာဘုရား ရတနာစံကျောင်းတော်ရှိ ရေပြင်မှာ စည်ကားသိုက်မြိုက်စွာ ကျင်းပသွားမှာဖြစ်ပါတယ်။အင်းလေးဖောင်တော်ဦးဘုရားပွဲတော်ဟာ ရှမ်းပြည်နယ်(တောင်ပိုင်း)ရဲ့ ထင်ရှားလှတဲ့ ရိုးရာဘုရားပွဲတော်တစ်ခုလည်းဖြစ်ကာ ရက်အရှည်ကြာဆုံးကျင်းပတဲ့ ဘုရားပွဲတော်တစ်ခုဖြစ်ကြောင်း၊ ခြေထောက်ဖြင့် လှေလှော်ခတ်ရသည့် အင်းသားရိုးရာလှေလှော်ပြိုင်ပွဲသည် အင်းသား အင်းသူတို့၏ ကိုယ်ပိုင်အားကစားနည်းလည်းဖြစ်တဲ့အတွက် ကမ္ဘာမှာ မြန်မာတစ်နိုင်ငံတည်းတွင်သာ တွေ့ရ၊ မြင်ရနိုင်ခြင်းတို့ကြောင့် ပြည်တွင်းပြည်ပ ခရီးသွားများ ဆွဲဆောင်ရာ ပွဲတော်လည်း ဖြစ်ပါတယ်။
