ရန်ကုန်မြို့ရှိ လူစည်ကားရာနေရာများတွင် အလှဓာတ်ပုံများ လိုက်လံရိုက်ကူးပေးပြီးနောက် ခြိမ်းခြောက်ငွေတောင်းသော ဖြစ်ရပ်မျိုး အမျိုးသမီးများကြား၌ကြုံတွေ့လာကြောင်း ကိုယ်တိုင်ကြုံသူများက လူမှုကွန်ရက် တွင် အသိပေးဖော်ပြချက်အရ သိရပါတယ်။ယခုနောက်ပိုင်း ရန်ကုန်တွင်သွားလာသူများ၏ Fashion များနှင့် street ware များကို သဘောကျ၍ ခွင့်တောင်းပြီး အလှဓာတ်ပုံရိုက်ယူကြသော ဝါသနာဓာတ်ပုံဆရာများ အများအပြားပေါ်ပေါက်လာပြီးနောက်တွင် အချို့မှာ အဆိုပါရိုက်ကူးထားသည့် ဓာတ်ပုံများကို ပြန်ရွေးရန်ခြိမ်းခြောက်၍ ငွေတောင်းယူမှုများ ကြုံလာခြင်း ဖြစ်ကြောင်း ပြောဆိုလာကြခြင်းဖြစ်ပါတယ်။ထိုသို့သော အဖြစ်မျိုးကို ရန်ကုန်မြို့ရှိ လူစည်ကားရာ နေရာများသို့ သွားရောက်သော လူငယ်အမျိုး သမီးများ ကြားတွင် ကြုံလာရခြင်းဖြစ်ပြီး လွန်ခဲ့သော မေလအတွင်းလောက်ကတည်းက ကြုံသူအချို့ရှိသော်လည်း ယခု နောက်ပိုင်းတွင် ကြုံလာသူမှာ အများအပြားရှိလာကြောင်း သိရသည်။
“ကျွန်မတို့ ခံခဲ့ရတဲ့သူတွေကို တစ်ချို့ကဝေဖန်သေးတယ်၊ public ကြီးမှာ မရိုက်ချင်ကျော်သွားတဲ့၊ ကြုံခဲ့တာ တစ်ခုပြောပြမယ်၊ လှည်းတန်းစင်တာမှာပဲ ယောကျ်ားလေးနှစ်ယောက်က ပုံမရိုက်ချင်ဘူးပြောတာတောင် နောက်ကနေ တောက်လျှောက်ကိုလိုက်ပြောတာ၊ ဒီလိုနေရာမျိုးတွေမှာ ကင်မရာကြီးနဲ့အလှ ဓာတ်ပုံလွယ်လွယ်ရိုက်လို့မရဘူး၊ အခုကြုံတုန်း ရိုက်ပေးပါရစေ promotion ဆိုပြီး အနောက်ကနေ ဘယ်သွားသွား တောက်လျှောက်ကိုလိုက်လာတာ၊ ကိုယ်ကစျေးဝယ်ဖို့ သွားတာလည်း ကောင်းကောင်းမသွားရဘူး၊ တခြားလူတွေက ဘာတွေလဲဆိုပြီး ဝိုင်းကြည့်တာ ဣန္ဒြေလည်းပျက်လို့၊ ဒေါသတော်တော်ထွက်ဖို့ကောင်းတယ်၊ နင်တို့ ဆက်ပြီး နှောင့်ယှက်ရင် ကင်မရာရိုက်ခွဲပစ်မယ်လို့ ဒေါသထွက်ထွက်နဲ့ ပြန်ရန်တွေ့မှပဲ တော်သေးတယ်”ဟု ကိုယ်တိုင်ကြုံသူ နောက်တစ်ဦးက ပြောသည်။
