ယနေ့မနက်ပိုင်းက မြဝတီနဲ့ မဲဆောက်မြို့ ဆက်သွယ်ထားတဲ့ ထိုင်း-မြန်မာ အမှတ် (၂) ချစ်ကြည်ရေးတံတားကို မြန်မာဘက်ကပိတ်လိုက်တာကြောင့် နယ်စပ်ကုန်သွယ်ရေးရပ်တန့်ပြီး သယ်ယူပို့ဆောင်ရေးစရိတ်တွေမြင့်တက်သွားတယ်လို့ ကုန်သည်တချို့က ပြောပါတယ်။နှစ်နိုင်ငံချစ်ကြည်ရေးတံတား အမှတ် (၂) မြဝတီအဝင် မဲဆောက်ဘက်မှာ ကုန်တင်ယာဉ် အစီး ၅၀၀ ကျော် ပိတ်မိနေတယ်လို့ ပြီးခဲ့တဲ့ရက်ပိုင်းက ဒေသတွင်းသတင်းတချို့မှာ ဖော်ပြပါတယ်။တချို့ ကုန်တင်ယာဉ်တွေဟာ မဲဆောက်ဘက်ကမ်းမှာ တစ်လကျော်နီးပါး ကြာမြင့်နေပြီဖြစ်ပြီး ဂိုဒေါင်စရိတ်၊ ယာဉ်ရပ်နားစရိတ်တွေ ဆက်တိုက်မြင့်တက်လာတဲ့အပြင် ကုန်ပစ္စည်းတွေ ပျက်စီးသွားမှာကိုလည်း တင်သွင်းလာတဲ့ ကုန်သည်တချို့က စိုးရိမ်နေတာပါ။လက်ရှိမှာ မဲဆောက်မြို့ရဲ့ ကုန်တင်ကုန်ချဝန်း၊ ယာဉ်ရပ်နားဝန်းတွေမှာ ပိတ်မိနေတဲ့ ကုန်ကားဟာ အများစု ယခင်က ပုံမှန်တင်သွင်းနေကြ ကုန်စည်တွေပဲဖြစ်တယ်လို့ ထိုင်းကုန်ပစ္စည်းတင်သွင်းသူတချို့က ပြောပါတယ်။အခုလို ထိုင်းနယ်စပ်ကုန်သွယ်ရေးလမ်းကြောင်း ပိတ်နေတာကြောင့် ရန်ကုန်မြို့က ဈေးကွက်ထဲမှာလည်း ထိုင်းနိုင်ငံက တင်သွင်းတဲ့ အိုင်တီပစ္စည်းတွေ ပြတ်လပ်တာတွေရှိလာပါတယ်။
