ဗီယက်နမ် နိုင်ငံသားဖြစ်ရန် နေထိုင်မှုစည်းမျဉ်း မလိုအပ်တော့သည့် နိုင်ငံခြားသား အိမ်ထောင်ဖက်များအတွက် ဥပဒေသစ် အတည်ပြု

ဗီယက်နမ်နိုင်ငံ၏ အမျိုးသားလွှတ်တော်မှ အတည်ပြုလိုက်သော ဥပဒေသစ်တစ်ရပ်အရ ဗီယက်နမ်နိုင်ငံသားများနှင့် အိမ်ထောင်ပြုထားသည့် နိုင်ငံခြားသားများသည် ယခင်က ပြဋ္ဌာန်းထားခဲ့သော နေထိုင်မှုကာလ၊ ဘာသာစကား သို့မဟုတ် ငွေကြေးဆိုင်ရာ လိုအပ်ချက်များကို ပြည့်မီရန် မလိုအပ်ဘဲ ဗီယက်နမ်နိုင်ငံသားအဖြစ် လျှောက်ထားနိုင်တော့မည် ဖြစ်သည်။ဇွန်လ ၂၄ ရက်နေ့တွင် ဗီယက်နမ်အမျိုးသားလွှတ်တော်၏ ကိုယ်စားလှယ် ၄၁၆ ဦးစလုံးက ဗီယက်နမ်နိုင်ငံသားဥပဒေကို ပြင်ဆင်သည့် ဥပဒေကြမ်းအား ထောက်ခံမဲပေးခဲ့ကြသည်။

ပြင်ဆင်လိုက်သော ဥပဒေအရ ဗီယက်နမ်နိုင်ငံသားများနှင့် အိမ်ထောင်ပြုထားသည့် နိုင်ငံခြားသားများ သို့မဟုတ် ဗီယက်နမ်နိုင်ငံသား သားသမီးများ ရှိသည့် နိုင်ငံခြားသားများ နှင့် နိုင်ငံမဲ့သူများအတွက် ကန့်သတ်ချက်များ ကင်းလွတ်ခွင့်ပြုထားကြောင်း နိုင်ငံပိုင်မီဒီယာများက ဖော်ပြသည်။ယခင်က လျှောက်ထားသူများအနေနှင့် နိုင်ငံသားဖြစ်ရန် အရည်အချင်းပြည့်မီဖို့ ဗီယက်နမ်နိုင်ငံတွင် အနည်းဆုံး ငါးနှစ် နေထိုင်ခဲ့ရခြင်း၊ ဗီယက်နမ်ဘာသာစကား တတ်ကျွမ်းမှုရှိကြောင်း ပြသနိုင်ခြင်းနှင့် မိမိကိုယ်ပိုင်ငွေကြေးဖြင့် ရပ်တည်နိုင်ကြောင်း သက်သေပြရန် လိုအပ်ခဲ့သည်။ ယခုဥပဒေသစ်အရ အရည်အချင်းပြည့်မီသော လျှောက်ထားသူများအတွက် ဤလိုအပ်ချက်များကို ရုပ်သိမ်းလိုက်ပြီ ဖြစ်သည်။