အိန္ဒိယနိုင်ငံ ဂူဂျာရတ်ပြည်နယ်တွင် ယခုသီတင်းပတ်အစောပိုင်းမှစ၍ အချိန်အခါမဟုတ် ဖုန်မှုန့်နှင့် မိုးကြိုးမုန်တိုင်းများ ဝင်ရောက်တိုက်ခတ်မှုကြောင့် လူ ၁၄ ဦးထက်မနည်း သေဆုံးခဲ့ပြီဖြစ်ကာ မြို့ပေါင်း ၁၀၄ မြို့တွင် ပုံမှန်လှုပ်ရှားသွားလာမှုများကို အနှောင့်အယှက်ဖြစ်စေခဲ့သည်။ ပြည်နယ်တစ်ခွင်တွင် နောက် ၅ ရက်ခန့်အထိ မိုးဆက်လက်ရွာသွန်းနေမည်ဟု ခန့်မှန်းထားကာ အာမက်ဒါဘတ်အပါအဝင် ခရိုင် ၂၉ ခုတွင် သတိပေးချက်ထုတ်ထားသည်။ တရားဝင်သတင်းထုတ်ပြန်ချက်များအရ မေလ ( ၄ ) ရက်တနင်္ဂနွေနေ့တွင် မိုးကြိုးပစ်၍ လူတစ်ဦး သေဆုံးခဲ့ပြီး မေလ ( ၅ ) ရက်တနင်္လာနေ့တွင် လေပြင်းတိုက်ခတ်ခြင်း၊ မိုးသည်းထန်စွာရွာသွန်းခြင်းများကြောင့် ဒေသအများအပြား၌ ထိခိုက်ပျက်စီးမှုများနေရာအနှံ့ဖြစ်ခဲ့ကာ လူ ၁၃ ဦး သေဆုံးခဲ့သည်ဟု ဆိုသည်။
