မြန်မာနိုင်ငံတွင် ၂၀၂၅ ခုနှစ် မတ် ၂၈ ရက်က အင်အားပြင်းငလျင်ကြီး လှုပ်ခတ်ခဲ့မှုကြောင့် မန္တလေး၊ စစ်ကိုင်း၊ နေပြည်တော်၊ ရှမ်းပြည်နယ်တောင်ပိုင်း စသည့်ဒေသများ၌ နေအိမ်အဆောက်အအုံများစွာ ထိခိုက်ပျက်စီးဆုံးရှုံးခဲ့သည်။အဆိုပါငလျင်ဒဏ်ကို ပြင်းထန်စွာခံစားခဲ့ရသည့် တိုင်းဒေသကြီးနှင့် ပြည်နယ်ခြောက်ခုတို့တွင် ငလျင်စတင်လှုပ်ခတ်သည့်နေ့မှ မေ ၄ ရက်နေ့အထိ သေဆုံးသူ ၃၇၈၅ ဦး၊ ထိခိုက်ဒဏ်ရာရရှိသူ ၅၁၀၅ ဦးနှင့် ပျောက်ဆုံးသူ ၉၂ ဦးရှိသည်။ ထိုသို့ ထိခိုက်၊ သေဆုံးမှုများသည် မခိုင်ခံ့သောအဆောက်အအုံများ၏ ပြိုကျပိတ်မိမှုများကြောင့် ဝမ်းနည်းကြေကွဲဖွယ်ရာ အဖြစ်ဆိုးများနှင့် ကြုံတွေ့ခဲ့ရခြင်းဖြစ်သည်။ အဆိုပါဖြစ်ပေါ်ခဲ့မှုများကို သင်ခန်းစာယူ၍ အဆောက်အအုံများကြံ့ခိုင်မှုနှင့် ပတ်သက်၍ ဗိသုကာအင်ဂျင်နီယာပညာရှင်များ၏ ဆန်းစစ်အကြံပြုလမ်းညွှန်ချက်များနှင့်အညီ ကြိုတင်ပြင်ဆင်ဆောင်ရွက်ကြရမည်ဖြစ်သည်။
