စစ်ကိုင်းတိုင်း၊ စစ်ကိုင်းမြို့ လေးကျွန်းမြေအုတ်ကျောင်း ငလျင်ကြောင့် ပြိုကျပျက်စီးတဲ့နေရာမှ အသက် ၈နှစ်အရွယ် ကလေး ၂ဦးရဲ့ ရုပ်အလောင်းများကို ဒီကနေ့ နေ့လယ် ၁၁နာရီ ၂၀မိနစ်က ရှာဖွေတွေ့ရှိခဲ့တယ်လို့ မြန်မာနိုင်ငံမီးသတ်တပ်ဖွဲ့ ဌာနချုပ်က ထုတ်ပြန်ပါတယ်။လေးကျွန်းမြေအုတ်ကျောင်း ပြိုကျပျက်စီးသည့်နေရာသို့ ဒီကနေ့ မတ်လ ၃၁ရက်နေ့မှာ စစ်ကိုင်းမြို့နယ်မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များဖြင့် ကူညီကယ်ဆယ်ရေးလုပ်ငန်းများ ဆောင်ရွက်နေချိန် တွေ့ရှိခဲ့တာဖြစ်ပြီး ရှာဖွေကယ်ဆယ်ရေးလုပ်ငန်းများကို ဆက်လက်ပြုလုပ်နေတယ်လို့ သိရပါတယ်။
