ဂျပန်အစိုးရက ၎င်းတို့၏ ဧရာမ အစိုးရပင်စင်ရန်ပုံငွေများကို ပြည်ပရင်းနှီးမြှုပ်နှံမှုများမှတစ်ဆင့် ပြည်တွင်းပိုင်ဆိုင်မှုများ (Domestic Assets) ထံသို့ အကြီးအကျယ် ရွှေ့ပြောင်းရန် အရိပ်အမြွက် ပြသလိုက်ပြီးနောက် State Street နှင့် Legal & General ကဲ့သို့သော ကမ္ဘာလုံးဆိုင်ရာ အခြေစိုက် ရန်ပုံငွေစီမံခန့်ခွဲမှု ကုမ္ပဏီကြီးများသည် အမေရိကန်ဒေါ်လာ သန်းပေါင်းများစွာ တန်ဖိုးရှိသော စီမံခန့်ခွဲခ (Management fees) များကို ဆုံးရှုံးရမည့် အခြေအနေနှင့် ရင်ဆိုင်နေရသည်။
ဂျပန်ဘဏ္ဍာရေးဝန်ကြီး ဆတ်ဆူကီ ကာတာယာမာ (Satsuki Katayama) က ကမ္ဘာ့အကြီးဆုံး ပင်စင်ရန်ပုံငွေဖြစ်သည့် ဂျပန်အစိုးရ ပင်စင်ရင်းနှီးမြှုပ်နှံမှု ရန်ပုံငွေ (GPIF) အပါအဝင် အစိုးရရန်ပုံငွေများကို ဂျပန်ပြည်တွင်း ဘဏ္ဍာရေးပိုင်ဆိုင်မှုများတွင် သိသိသာသာ တိုးမြှင့်ရင်းနှီးမြှုပ်နှံသွားရန် ရည်မှန်းထားကြောင်း ပြောကြားခဲ့သည်။ ယင်းထုတ်ပြန်ချက်ကြောင့် ဂျပန်ယန်းငွေနှင့် အစိုးရခံဝန်ချုပ် (Bonds) စျေးကွက်များ ပြန်လည်ဦးမော့လာခဲ့သော်လည်း ပြည်ပရင်းနှီးမြှုပ်နှံမှုများကို အဓိက ကိုင်တွယ်ပေးနေရသည့် နိုင်ငံခြား Asset Managers များအတွက်မူ စိုးရိမ်စရာ ဖြစ်လာခဲ့သည်။လက်ရှိတွင် GPIF ၏ အမေရိကန်ဒေါ်လာ ၁.၈ ထရီလီယံ (ယန်း ၂၉၃.၆ ထရီလီယံ) ရှိသော ရန်ပုံငွေများ၏ ထက်ဝက်ခန့်ကို ပြည်ပစတော့ရှယ်ယာများနှင့် ဘွန်းများတွင် ရင်းနှီးမြှုပ်နှံထားခြင်း ဖြစ်သည်။ အကယ်၍ ဂျပန်အစိုးရ၏ ညွှန်ကြားချက်ကြောင့် ပြည်ပပိုင်ဆိုင်မှုများကို လျှော့ချပြီး ပြည်တွင်းသို့ ငွေပြန်လည်ယူဆောင်လာပါက နိုင်ငံခြား passive စီမံခန့်ခွဲသူများ ဖိအားဝင်နိုင်ပြီး ဂျပန်ပြည်တွင်းစျေးကွက်တွင် ကျွမ်းကျင်သော active မန်နေဂျာများသာ အကျိုးအမြတ် ရရှိနိုင်တော့မည်ဖြစ်ကြောင်း ကျွမ်းကျင်သူများက သုံးသပ်ထားကြသည်။
